Бап 74 ҚР Әкімшілік рәсімдік-процестік кодексінің. Ауызша нысанда тыңдау хаттамасы

Тармақ 1. Ауызша нысанда тыңдау хаттамасы компьютерлік, электрондық, машинкамен жазу не қолжазба тәсілдерімен дайындалады.

Тармақ 2. Ауызша нысанда тыңдау хаттамасында:

• 1) әкімшілік іс қаралатын орын мен күн, оның басталатын және аяқталатын уақыты;
• 2) әкімшілік органның атауы, лауазымды адамның, хатшының тектері және аты-жөні;
• 3) әкімшілік рәсімге қатысушы және (немесе) әкімшілік іске қатысатын өзге де адам туралы мәліметтер;
• 4) қаралатын мәселенің мазмұны;
• 5) қатысатын тұлғалардың түсініктемелерінің, сұрақтары мен жауаптарының, сөйлеген сөздерінің мазмұны көрсетіледі.

Тармақ 3. Әкімшілік рәсімге қатысушы және (немесе) әкімшілік іске қатысатын өзге де адам әкімшілік істі қарау үшін өздері елеулі деп есептейтін нақты мән-жайлар туралы мәліметтерді ауызша нысанда тыңдау хаттамасына енгізу туралы өтінішхат беруге құқылы.

Тармақ 4. Ауызша нысанда тыңдау хаттамасын төрағалық етуші мен хатшы ауызша нысанда тыңдау аяқталғаннан кейін екі жұмыс күнінен кешіктірмей дайындауға және қол қоюға тиіс.

Тармақ 5. Әкімшілік орган, лауазымды адам әкімшілік рәсімге қатысушыға және әкімшілік іске қатысатын өзге де тұлғаға ауызша нысанда тыңдау хаттамасымен танысу мүмкіндігін қамтамасыз етуге міндетті.

Тармақ 6. Әкiмшiлiк рәсiмге қатысушы және әкімшілік іске қатысатын өзге де адам танысқаннан кейін үш жұмыс күні ішінде ауызша нысанда тыңдау хаттамасына өз ескертулерін беруге құқылы.

Ескертулерді қарау нәтижелері бойынша төрағалық етуші оларды қанағаттандыру не оларды толық немесе ішінара қабылдамау туралы шешім қабылдайды. Барлық ескерту әкімшілік іске қоса тігіледі.