Бап 1 ҚР Әкімшілік құқық бұзушылық туралы кодексінің

Тармақ 1. Қазақстан Республикасының әкiмшiлiк құқық бұзушылық туралы заңнамасы осы Кодекстен тұрады.

Тармақ 2. Осы Кодекс Қазақстан Республикасының Конституциясына, халықаралық құқықтың жалпы танылған қағидаттары мен нормаларына негiзделедi.

Тармақ 2-1. Осы Кодекске өзгерістер және (немесе) толықтырулар енгізу:

• 1) әкімшілік жауаптылықты болғызбайтын;
• 2) Қазақстан Республикасы Президентінің заң шығару бастамасы тәртібімен әзірленген;
• 3) Қазақстан Республикасының Қылмыстық кодексіне , Қазақстан Республикасының Қылмыстық-процестік кодексіне және Қазақстан Республикасының Қылмыстық-атқару кодексіне өзгерістер және (немесе) толықтырулар енгізетін Қазақстан Республикасының заңдарын қоспағанда, Қазақстан Республикасының басқа да заңнамалық актілеріне өзгерістер және (немесе) толықтырулар енгізуді көздемейтін Қазақстан Республикасының заңымен жүзеге асырылады.

Тармақ 3. Әкімшілік-деликтік құқықтық қатынастарды реттейтін Қазақстан Республикасының халықаралық шарттық және өзге де міндеттемелері, сондай-ақ Қазақстан Республикасы Конституциялық Сотының және Жоғарғы Сотының нормативтік қаулылары әкімшілік құқық бұзушылық туралы заңнаманың құрамдас бөлігі болып табылады.

Тармақ 4. Қазақстан Республикасы ратификациялаған халықаралық шарттар осы Кодекс алдында басымдыққа ие болады және халықаралық шарттан оны қолдану үшiн заң шығаруды талап ету туындайтын жағдайлардан басқа кезде, тiкелей қолданылады. Егер Қазақстан Республикасы ратификациялаған халықаралық шартта Қазақстан Республикасының әкiмшiлiк құқық бұзушылық туралы заңнамасында көзделгеннен өзгеше қағидалар белгiленсе, онда халықаралық шарттың қағидалары қолданылады.