Бап 85 ҚР Қылмыстық іс жүргізу кодексінің

Тармақ 1. Тараптар заң талаптарына сәйкес медиацияны жүргізу үшін тартатын тәуелсіз жеке тұлға медиатор болып табылады.

Тармақ 2. Медиатор:

• 1) медиация тараптарына қылмыстық процесті жүргізетін орган беретін ақпаратпен танысуға;
• 2) медиация тараптары болып табылатын қылмыстық процеске қатысушылар туралы деректермен танысуға;
• 3) қылмыстық-процестік заңға сәйкес кездесулердің саны мен ұзақтығын шектемей, медиация тараптары болып табылатын қылмыстық процеске қатысушылармен оңаша және құпия кездесуге;
• 4) тараптарға медиация тәртібімен татуласуға қол жеткізу туралы келісім жасасуға жәрдемдесуге құқылы.

Тармақ 3. Медиатор:

• 1) медиация жүргізген кезінде медиация тараптарының келісуімен ғана әрекет жасауға;
• 2) медиация басталғанға дейін медиация тараптарына оның мақсаттарын, сондай-ақ олардың құқықтары мен міндеттерін түсіндіруге;
• 3) медиация рәсімін өткізуге байланысты өзіне белгілі болған мәліметтерді жария етпеуге міндетті.

Тармақ 4. Медиатор тараптардың келісуімен медиация рәсімін қылмыстық құқық бұзушылық туралы арыз бен хабар тіркелген кезден бастап және қылмыстық процестің үкім заңды күшіне енгенге дейінгі кейінгі сатыларында жүзеге асыруға құқылы.