Кедендік декларацияны кері қайтарып алуға кеден органының рұқсатымен жол беріледі. Кеден органының рұқсаты не осындай рұқсатты беруден бас тарту электрондық құжат немесе қағаз жеткізгіштегі құжат түрінде ресімделеді.Егер декларанттың өтінішін алғанға дейін кеден органы декларантты кедендік декларацияда мәлімделген тауарларға кедендік жете тексеруді жүргізу орны мен уақыты туралы хабардар етпесе, кедендік декларацияда мәлімделген тауарларға кедендік қарап-тексеруді жүргізу туралы шешім қабылдамаса, кедендік сараптама жүргізуді тағайындамаса және (немесе) әкімшілік немесе қылмыстық жауаптылыққа алып келетін, Еуразиялық экономикалық одақтың кеден заңнамасының және (немесе) Қазақстан Республикасының кеден және өзге де заңнамасының бұзушылықтарын анықтамаса, кедендік декларацияны кері қайтарып алуға жол беріледі.
Тауарларға кедендік қарап-тексеру, тауарларды кедендік жете тексеру жүргізілгеннен, кедендік сараптама нәтижелері алынғаннан кейін кедендік декларация, егер оларды жүргізу нәтижелері бойынша әкімшілік немесе қылмыстық жауаптылыққа алып келетін Еуразиялық экономикалық одақтың кеден заңнамасының және (немесе) Қазақстан Республикасының кеден және өзге де заңнамасының бұзушылықтары белгіленбесе, кері қайтарылып алынуы мүмкін.