Тармақ 1. Керек-жарақтарды Еуразиялық экономикалық одақтың кедендік аумағына әкелу кезінде оларды кедендік декларациялауға және шығаруға байланысты кедендік операциялар келу орындарында не халықаралық тасымалдауды аяқтау орындарында жасалады.
Тармақ 2. Керек-жарақтарды Еуразиялық экономикалық одақтың кедендік аумағынан әкету кезінде оларды кедендік декларациялауға және шығаруға байланысты кедендік операциялар халықаралық тасымалдау басталған орындарда не кету орындарында жасалады.
Кеден қоймасы кедендік рәсімімен орналастырылған тауарларды керек-жарақтар ретінде кедендік декларациялаумен және шығарумен байланысты кедендік операциялар өзінің қызмет аймағында кеден қоймасы тұрған кеден органында жасалады.
Тармақ 3. Еуразиялық экономикалық одақтың кедендік аумағына келген және Еуразиялық экономикалық одақтың мұндай кедендік аумағынан кететін (су немесе әуе кемесінің борттарында не пойызда) халықаралық тасымалдау көлік құралындағы керек-жарақтарды кедендік декларациялау көлік құралына арналған декларация пайдаланыла отырып, халықаралық тасымалдаудың көлік кұралын кедендік декларациялаумен қатар бір мезгілде жүзеге асырылуы мүмкін.
Керек-жарақтарды кедендік декларациялау, егер мұндай керек-жарақтар Еуразиялық экономикалық одақтың кедендік аумағына осы әуе кемелерінің бортынан осы керек-жарақтарды түсіру (қайта тиеу) бойынша операцияларды жасамай келген және мұндай аумақтан кететін әуе кемелерінің борттарында бар болса, жүзеге асырылмайды.
Тармақ 4. Еуразиялық экономикалық одақтың кедендік аумағына келген немесе осындай Еуразиялық экономикалық одақтың кедендік аумағынан кететін су және әуе кемелерінің борттарына немесе пойыздарға түсірілетін, қайта тиелетін, тиелетін керек-жарақтарды кедендік декларациялау тауарларға арналған декларация пайдаланыла отырып жүзеге асырылады.
Тауарларға арналған декларация пайдаланыла отырып, керек-жарақтарды кедендік декларациялау кезінде осындай тауарларға арналған декларация ретінде тауарларды шығару үшін қажетті мәліметтерді қамтитын тасу (тасымалдау), коммерциялық және (немесе) өзге де құжаттар пайдаланылуы мүмкін.
Көрсетілген керек-жарақтарды кедендік декларациялау кезінде тауарларға арналған декларацияда көрсетуге жататын мәліметтерді Комиссия айқындайды.
Тармақ 5. Керек-жарақтар ретінде кеден қоймасы кедендік рәсімімен және бажсыз сауда кедендік рәсімімен орналастырылған тауарларды кедендік декларациялау тауарларға арналған декларация пайдаланыла отырып жүзеге асырылады.
Тармақ 6. Керек-жарақтарға қатысты кедендік операциялар тіркелу еліне немесе су, әуе кемелерінің немесе пойыздардың ұлттық тиесілігіне қарамастан, бірдей жасалады.
Тармақ 7. Комиссия керек-жарақтарға қатысты кедендік декларациялау және өзге де кедендік операцияларды жасау ерекшеліктерін айқындауға құқылы.