Тармақ 1. Электр беру желілері бойынша өткізілетін тауарларды (бұдан әрі осы тарауда – электр энергиясы) Еуразиялық экономикалық одақтың кедендік аумағына әкелуге және Еуразиялық экономикалық одақтың кедендік аумағынан әкетуге кеден органына кедендік декларация берілгенге дейін жол беріледі.
Тармақ 2. Электр энергиясын ішкі тұтыну үшін шығарудың немесе экспорттың кедендік рәсімдерімен орналастыру үшін кедендік декларация әрбір күнтізбелік айдан кейінгі күнтізбелік айдың соңғы күнінен кешіктірілмей беріледі.
Тармақ 3. Кедендік декларацияны беру кезінде кеден органына электр энергиясын көрсету талап етілмейді.
Тармақ 4. Еуразиялық экономикалық одақтың кедендік аумағына әкелінген немесе Еуразиялық экономикалық одақтың кедендік аумағынан әкетілген электр энергиясының нақты мөлшері кедендік декларациялауға жатады.
Электр энергиясының мөлшері технологиялық келісілген жерлерде орнатылған және электр энергиясының өтуін белгілейтін электр энергиясын есепке алу аспаптары көрсеткіштерінің, тиісті шарт бойынша электр энергиясын іс жүзінде жеткізу туралы актілердің, тапсыру-қабылдау (қабылдау-тапсыру) актілерінің және электр энергиясының сальдо-артық легі (кернеудің барлық сыныптарының жұмыс істеп тұрған барлық мемлекетаралық электр беру желісі бойынша қарсы бағыттардағы электр энергиясы артық легінің алгебралық сомасы) ретінде электр энергиясының іс жүзінде өтуін растайтын өзге де құжаттардың негізінде әрбір күнтізбелік ай үшін айқындалады.
Егер бұл мемлекетаралық электр беру желілерін пайдалануға және мемлекетаралық электр беру желілері бойынша өткізілетін тауарларды есепке алуға жауапты ұйымдар арасында жасалған электр энергиясының артық легін есепке алуды ұйымдастыру туралы келісімдерде көзделсе, электр энергиясының сальдо-артық легінің есептелген мәні электр энергиясын өткізген кезде мұндай келісімдерге сәйкес айқындалатын желілерде орын алған электр энергиясының ысырабы шамасына түзетіледі.
Бір шарт (келісімшарт) бойынша жеткізілетін электр энергиясы жеткізудің күнтізбелік бір айы ішінде тауарлардың бір партиясы ретінде декларацияланады.
Тармақ 5. Энергия жүйелерінің қосарлы жұмысы кезінде электр энергиясының жоспардан тыс (технологиялық) артық легін кедендік декларациялау шаруашылық жүргізуші субъектілердің шарттарына (келісімшарттарына) сәйкес ресімделген, электр энергиясының жоспардан тыс (технологиялық) артық легінің көлемі көрсетілген электр энергиясын іс жүзінде жеткізу туралы актілерге қол қойылғаннан кейін күнтізбелік он күннен кешіктірілмей жүргізіледі. Бұл ретте, тауарларға арналған декларацияны беру мерзімі оны іс жүзінде жеткізудің күнтізбелік айы аяқталғаннан кейін күнтізбелік екі айдан аспауға тиіс.
Тармақ 6. Еуразиялық экономикалық одақтың тауары мәртебесіне ие электр энергиясы Еуразиялық экономикалық одаққа мүше болып табылмайтын мемлекеттің аумағы арқылы Еуразиялық экономикалық одақтың кедендік аумағының бір бөлігінен Еуразиялық экономикалық одақтың кедендік аумағының басқа бөлігіне өткізу үшін кедендік транзиттің кедендік рәсімімен орналастырылмайды.
Тармақ 7. Еуразиялық экономикалық одақтың тауары мәртебесіне ие электр энергиясы Еуразиялық экономикалық одаққа мүше болып табылмайтын мемлекеттің аумағы арқылы өткізілген кезде, осындай тауарларды өткізу Қазақстан Республикасының аумағынан басталған жағдайда Қазақстан Республикасының жөнелтушісі (жөнелтушілері) немесе тасымалдаушысы (тасымалдаушылары) және осындай тауарларды өткізу Қазақстан Республикасының аумағында аяқталған жағдайда Қазақстан Республикасының алушысы (алушылары) немесе тасымалдаушы (тасымалдаушылары) тауарларды өткізудің күнтізбелік айдан кейінгі күнтізбелік айдың соңғы күніне дейін кеден органына мынадай мәліметтерді көрсете отырып, өтініш ұсынады:
Тармақ 8. Еуразиялық экономикалық одақтың тауары мәртебесіне ие электр энергиясын Еуразиялық экономикалық одаққа мүше болып табылмайтын мемлекеттің аумағы арқылы электр беру желілері бойынша өткізген кезде электр энергиясы Еуразиялық экономикалық одақтың тауары мәртебесін сақтайды.
Тармақ 9. Еуразиялық экономикалық одақтың кедендік аумағы арқылы электр энергиясын өткізген кезде аумағында осындай тауарларды өткізу жүзеге асырылатын Қазақстан Республикасының тасымалдаушысы (тасымалдаушылары) электр энергиясын өткізудің күнтізбелік айынан кейінгі күнтізбелік айдың соңғы күніне дейін кеден органына есептік кезең ішінде электр энергиясының өткізілген көлемдері туралы мәліметтерді көрсете отырып өтініш ұсынады.
Тармақ 10. Электр энергиясы Еуразиялық экономикалық одаққа мүше бірнеше мемлекеттің аумақтары бойынша өткізілген жағдайда, Еуразиялық экономикалық одаққа мүше мемлекеттердің кеден органдарының электр энергиясы туралы ақпарат алмасу бойынша өзара іс-қимыл жасау тәртібін Комиссия айқындайды.