Бап 537 ҚР Кеден реттеу туралы кодексінің. Бірінші кезектегі тәртіппен кедендік операцияларды жасау

Тармақ 1. Бірінші немесе үшінші типтегі куәлігі бар уәкілетті экономикалық оператор жасайтын, Еуразиялық экономикалық одақтың кедендік аумағына тауарлардың келуімен немесе Еуразиялық экономикалық одақтың кедендік аумағынан тауарлардың кетуімен байланысты кедендік операциялар Еуразиялық экономикалық одақтың кедендік шекарасы арқылы тауарларды өткізу орындарында техникалық және инфрақұрылымдық мүмкіндіктер болған кезде бірінші кезектегі тәртіппен жасалады.

Тармақ 2. Еуразиялық экономикалық одақтың кедендік шекарасы арқылы тауарларды өткізу орындарында техникалық және инфрақұрылымдық мүмкіндіктер болған кезде кеден органдары кедендік операцияларды бірінші кезектегі тәртіпен жасауды ұйымдастыру үшін:

• 1) мұндай операцияларды жасау үшін лауазымды адамдарды айқындайды;
• 2) бірінші немесе үшінші типтегі куәлігі бар уәкілетті экономикалық операторлар үшін Еуразиялық экономикалық одақтың кедендік шекарасы арқылы автомобиль өткізу пункттерінде жекелеген жол жүру жолақтарын көздейді және мұндай өткізу пункттерінің тізбесін өздерінің интернет-ресурстарында орналастырады.

Тармақ 3. Тауарларды кедендік декларациялаумен және шығарумен байланысты кедендік операцияларды кеден органы, егер:

• 1) бірінші немесе үшінші типтегі куәлігі бар уәкілетті экономикалық оператор тауарлардың декларанты болып табылса;
• 2) кедендік декларациялаумен байланысты кедендік операцияларды бірінші немесе үшінші типтегі куәлігі бар уәкілетті экономикалық оператор болып табылатын кеден өкілі жасаса, бірінші кезектегі тәртіппен жүзеге асырады.