Тармақ 2. Өндірістік экологиялық бақылаудың мақсаттары мыналар болып табылады:
- 1) объект операторының ішкі экологиялық саясатқа, қоршаған ортаға ықтимал әсер ететін өндірістік процестерді бақылау мен реттеуге қатысты шешімдер қабылдауы үшін ақпарат алу;
- 2) Қазақстан Республикасының экология заңнамасы талаптарының сақталуын қамтамасыз ету;
- 3) өндірістік процестердің қоршаған ортаға, адамдардың өміріне және (немесе) денсаулығына жағымсыз әсер етуін барынша азайту;
- 4) табиғи және энергетикалық ресурстарды пайдалану тиімділігін арттыру;
- 5) тосын жағдайларға жедел алдын ала ден қою;
- 6) объект операторының басшылары мен жұмыскерлерінің экологиялық хабардар болуы мен жауапкершілігінің неғұрлым жоғары деңгейін қалыптастыру;
- 7) жұртшылыққа кәсіпорынның экологиялық қызметі туралы хабар беру;
- 8) экологиялық менеджмент жүйесінің тиімділігін арттыру.