Бап 223 ҚР Экологиялық кодексінің

Тармақ 1. Жерүсті су объектілеріндегі және олардың су қорғау белдеулеріндегі шаруашылық қызметке қойылатын талаптар осы Кодексте реттелмеген бөлікте Қазақстан Республикасының су заңнамасында белгіленеді.

Тармақ 2. Су қорғау аймағының шегінде:

• 1) су объектілерінің және олардың су қорғау аймақтары мен белдеулерінің ластануы мен қоқыстануын болғызбайтын құрылысжайлармен және құрылғылармен қамтамасыз етілмеген жаңа және реконструкцияланатын ғимараттарды, құрылысжайларды (селге қарсы, көшкінге қарсы және су тасқынына қарсы ғимараттар мен құрылысжайларды қоспағанда) және олардың кешендерін жобалауға, салуға және пайдалануға беруге;
• 2) мұнай өнімдерін сақтауға арналған қоймаларды, арнаулы техникаға техникалық қызмет көрсету пункттерін, механикалық шеберханаларды, көлік құралдары мен ауыл шаруашылығы техникасын жуу орындарын, қалдықтарды орналастыру орындарын орналастыруға және салуға, сондай-ақ судың сапасына жағымсыз әсер ететін басқа да объектілерді орналастыруға;
• 3) құрылыс, түбін тереңдету және жару жұмыстарын жүргізуге (селге қарсы, көшкінге қарсы және су тасқынына қарсы жұмыстарды қоспағанда), пайдалы қазбаларды өндіруге, кәбілдер, құбыржолдар және басқа да коммуникациялар тартуға, бұрғылау, ауыл шаруашылығы жұмыстарын және өзге де жұмыстарды жүргізуге, осы жұмыстар қоршаған ортаны қорғау, су қорын қорғау және пайдалану саласындағы уәкілетті мемлекеттік органдармен келісілген жағдайларды қоспағанда, тыйым салынады.

Тармақ 3. Елді мекендер шегінде су қорғау аймағының шекаралары оларды жағалау аймағын су объектісінің қоқыстануы мен ластануын болғызбайтындай етіп, міндетті түрде инженерлік немесе орман-мелиорациялық жайластыра отырып (парапеттер, бөгеттеу, орман-бұталы белдеулер) жоспарлау мен салудың нақты жағдайлары негізге алына отырып белгіленеді.