Бап 51-8 ҚР Халық денсаулығы туралы кодексінің

Тармақ 1. Мынадай негіздердің бірі болған кезде тексеру жарамсыз деп танылады:

• 1) тексеру жүргізу үшін негіздердің болмауы;
• 2) тексеруді тағайындау туралы актінің болмауы;
• 3) тексеру жүргізу кезеңділігінің бұзылуы;
• 4) ерекше бақылау және қадағалау субъектісіне тексеруді тағайындау және (немесе) оның мерзімдерін ұзарту (болған кезде) туралы актінің ұсынылмауы;
• 5) аумақтық бөлімшенің құзыретіне кірмейтін мәселелер бойынша тексерудің тағайындалуы;
• 6) тексеруді тағайындау және (немесе) оның мерзімдерін ұзарту (болған кезде) туралы акт белгіленген мерзімдерде мемлекеттік құқықтық статистика және арнайы есепке алу саласындағы қызметті өз құзыреті шегінде жүзеге асыратын мемлекеттік органға жіберілмей, тексерудің жүргізілуі;
• 7) тексеру жүргізудің осы параграфта көзделген мерзімдерінің бұзылуы.

Тармақ 2. Мынадай негіздердің бірі болған кезде мониторинг жарамсыз деп танылады:

• 1) мониторинг жүргізу үшін негіздердің болмауы;
• 2) аумақтық бөлімшенің құзыретіне кірмейтін талаптардың бақылануы;
• 3) ерекше бақылау және қадағалау субъектісіне мониторинг жүргізу туралы шешім көшірмесінің және (немесе) мониторинг мерзімін ұзарту туралы шешімнің (болған кезде) ұсынылмауы;
• 4) мониторинг нысанасы шеңберінен шығатын мәселелер бойынша мониторингтің жүргізілуі;
• 5) мониторинг жүргізу мерзімдерінің бұзылуы.

Тармақ 3. Жарамсыз деп танылған, тексеруді тағайындау, оның мерзімдерін ұзарту, тексеру немесе мониторинг нәтижелері туралы актілер, тексеру немесе мониторинг қорытындылары бойынша анықталған бұзушылықтарды жою туралы нұсқама ерекше бақылау және қадағалау субъектілерінің халықтың санитариялық-эпидемиологиялық саламаттылығы саласындағы нормативтік құқықтық актілер талаптарын бұзуының дәлелдемесі бола алмайды.

Тармақ 4. Тексеруді немесе мониторингті жарамсыз деп тану жоғары тұрған мемлекеттік органның немесе соттың осы тексеру немесе мониторинг нәтижелері бойынша актінің, анықталған бұзушылықтарды жою туралы нұсқаманың күшін жоюы үшін негіз болып табылады.

Тармақ 5. Тексерудің немесе мониторингтің жарамсыздығына байланысты тексеруді тағайындау, оның мерзімдерін ұзарту, тексеру немесе мониторинг нәтижелері туралы актілердің, анықталған бұзушылықтарды жою туралы нұсқаманың күшін жою туралы ерекше бақылау және қадағалау субъектісінің өтінішін жоғары тұрған мемлекеттік органның қарауы өтініш берілген күннен бастап он жұмыс күні ішінде жүзеге асырылады.

Мұндай өтінішті қараудың белгіленген мерзімінің бұзылуы ерекше бақылау және қадағалау субъектісінің пайдасына шешіледі.