Жер қойнауын пайдаланушы барлау кезеңінде және осы Кодексте белгіленген шектеулерді ескере отырып, осы тармақтың екінші бөлігінде көзделген жағдайды қоспағанда, барлау аумағында көмірсутектерді барлау жөніндегі жұмыстардың кез келген түрін жүргізуге құқылы.Аз зерттелген аумақтар шегінде орналасқан жер қойнауы учаскесінде көмірсутектерді барлауға және өндіруге арналған келісімшарт бойынша жер қойнауын пайдаланушыға барлау кезеңінің алғашқы үш жылы үшін көзделген жұмыстар бағдарламасын толық көлемде орындағанға дейін ұңғымаларды бұрғылауды жүргізуге тыйым салынады. Мұндай тыйым салу барлау кезеңінің алғашқы үш жылы үшін көзделген жұмыстар бағдарламасы мерзімінен бұрын орындалған және осы баптың 16-тармағына сәйкес геологиялық барлау жұмыстарының нәтижелері туралы есеп жер қойнауын зерттеу жөніндегі уәкілетті органмен келісілген жағдайда қолданылмайды.