Егер осы бапта өзгеше белгіленбесе, кірістер мен мүлік туралы декларацияны осы Кодекске сәйкес жеке тұлғаның өз бетінше салық салуына жататын кірістерді Қазақстан Республикасындағы көздерден алатын бейрезидент – жеке тұлға тұрғылықты (болатын) жері бойынша есепті күнтізбелік жылдан кейінгі жылдың 15 қыркүйегінен кешіктірмей ұсынады.
Ағымдағы салықтық кезеңнен кейінгі жылдың 31 наурызына дейін Қазақстан Республикасының аумағына кейіннен кірместен ағымдағы салықтық кезең ішінде Қазақстан Республикасының шегінен тыс жерлерге шыққан жағдайда, бейрезидент – жеке тұлға кірістер мен мүлік туралы декларацияны ұсынуға және ағымдағы салықтық кезең ішінде жеке табыс салығын төлеуге құқылы. Бұл ретте кірістер мен мүлік туралы декларация ағымдағы салықтық кезеңнің басынан бастап Қазақстан Республикасының шегінен тыс жерлерге осындай тұлға шыққан күнге дейінгі кезең үшін ұсынылады.
Кірістер мен мүлік туралы декларацияны есепті салықтық кезеңге есептелген жеке табыс салығының сомасы жеке табыс салығы бойынша алдын ала төлемдер сомасынан асып кеткен жағдайда, осы Кодекстің 644-бабы 1-тармағының бірінші бөлігінің 21) тармақшасында көрсетілген кірістерді алатын бейрезидент – еңбекші көшіп келушілер болатын жеріндегі салық органына есептi салықтық кезеңнен кейiнгi жылдың 31 наурызынан кешiктiрмей ұсынады.
Бұл ретте салықтық кезең ішінде осы Кодекстің 644-бабы 1-тармағының бірінші бөлігінің 21) тармақшасында көрсетілген кірістерді алған бейрезидент – еңбекші көшіп келуші Қазақстан Республикасының шегінен тыс жерлерге шыққан жағдайда, кірістер мен мүлік туралы декларация (декларациялар) осындай адамның Қазақстан Республикасының шегінен тыс жерлерге шығатын күніне дейін ұсынылады.