Тармақ 6. 1. Біріккен Ұлттар Ұйымы Үкіметке А қосымшасының 2-тармағында көрсетілген тариф бойынша осы Өзара түсіністік туралы меморандумға сәйкес берілетін персонал үшін шығысты өтейді.
Тармақ 6. 2. Біріккен Ұлттар Ұйымы Үкіметке В қосымшасында санамаланған негізгі қару-жараққа (жабдыққа) шығысты өтейді. Егер мұндай жабдық D және F қосымшаларында мазмұндалған талап етілетін пайдалану стандарттарына сәйкес келмеген немесе жабдық тізбесі қысқартылған жағдайда негізгі қару-жараққа (жабдыққа) арналған шығысты өтеу сомасы азаяды.
Тармақ 6. 3. Біріккен Ұлттар Ұйымы Үкіметке өзін-өзі қамтамасыз етуге байланысты тауарлар мен көрсетілетін қызметтерді ұсынуға арналған шығысты С қосымшасында көрсетілген баға бойынша және мөлшерде өтейді. Егер контингент Е және F қосымшаларында келтірілген талап етілетін стандарттарға сәйкес келмеген немесе өзін-өзі қамтамасыз ету деңгейі төмендеген жағдайда өзін-өзі қамтамасыз етуге арналған шығысты өтеу қысқартылады.
Тармақ 6. 4. Контингенттің персоналы үшін шығысты өтеу ол кеткен сәтке дейін толық тариф бойынша жалғасатын болады.
Тармақ 6. 5. Негізгі қару-жараққа (жабдыққа) жұмсалған шығысты өтеу әскерді ұсынатын тарап операцияларды тоқтатқан күнге дейін немесе миссия аяқталғанға дейін толық мөлшерлемемен жүргізілетін болады. Осыдан кейін Біріккен Ұлттар Ұйымы айқындағандай, әскерді/полицияны ұсынатын елдің бақылауынан тыс болады деп саналатын жағдайды қоспағанда, шығысты өтеу Өзара түсіністік туралы меморандумда келісілген тарифтің 50%-ына дейін қысқартылады және қару-жарақ (жабдық) миссия ауданынан шыққаннан кейін немесе операциялар тоқтатылған немесе миссия аяқталған күннен кейін 90 күн өткен соң (қайсысы ертерек болатынына байланысты) тоқтатылады.
Тармақ 6. 6. Өзін-өзі қамтамасыз етуге шығысты өтеу әскерді ұсынатын тарап операцияларды тоқтатқан немесе миссия аяқталған күнге дейін толық мөлшерлеме бойынша жүзеге асырылатын болады. Осыдан кейін өзін-өзі қамтамасыз етуге шығысты өтеу контингенттің барлық персоналы миссия ауданынан шыққанға дейін өрістетілген әскердің қалған нақты саны негізге алынып есептелген 100 пайыздық мөлшерлемемен жүргізіледі:
Тармақ 6. 7. Егер Біріккен Ұлттар Ұйымы мүлікті репатриациялауға келісімшарт жасау туралы келіссөз жүргізсе, ал жеткізуші күтілетін келу күнінен кейін 14 күндік жеңілдік кезеңінен асатын болса, онда әскерді ұсынатын елдің шығысын Біріккен Ұлттар Ұйымы күтілетіннен бастап нақты келетін күнге дейін қызмет көрсетпей жалға беру мөлшерлемесі бойынша өтейді.