Тармақ 1. Осы Келiсiмдi түсiндiруге немесе қолдануға байланысты даулар мүмкiндiгiне қарай дипломатиялық арналар арқылы реттелетiн болады. 2. Егер дау оны Уағдаласушы Тараптардың бiрi көтерген сәтiнен бастап алты айдың iшiнде реттеле алмайтын болса, ол Уағдаласушы Тараптардың кез келгенiнiң талап етуi бойынша төрелiк сотқа берiледi. 3. Аталған төрелiк сот әрбiр жекелеген жағдайда былайша құрылатын болады: Әрбiр Уағдаласушы Тарап бiр арбитр тағайындайды және бұл екi арбитр өзара келiсе отырып, екi Уағдаласушы Тарап төрелiк соттың төрағасы етiп тағайындайтын үшiншi мемлекет азаматын тағайындайды. Барлық арбитрлер Уағдаласушы Тараптардың бiрiнiң екiншi Уағдаласушы Тарапқа өзiнiң даулы мәселенi төрелiк сотқа бергiсi келетiнi туралы хабарлаған сәтiнен бастап екi айдың iшiнде тағайындалуға тиiс. 4. Егер 3-тармақта белгiленген мерзiмдер сақталмайтын болса, кез келген Уағдаласушы Тарап қандай да бiр басқа уағдаластық болмаған жағдайда Бiрiккен Ұлттар Ұйымының Бас Хатшысын қажеттi тағайындаулар жүргiзуге шақырады. Егер Бас Хатшы Уағдаласушы Тараптардың бiрiнiң азаматы болып табылатын болса немесе басқа бiр себептен аталған мiндеттердi атқара алмайтын болса, лауазымы жағынан Бас Хатшыдан кейiн тұрған және Уағдаласушы Тараптардың бірде біреуінің азаматы болып табылмайтын Бас Хатшының Орынбасары қажетті тағайындаулар жүргiзедi. 5. Төрелiк сот өз шешiмдерiн көпшiлiк дауыспен қабылдайды бұл шешiмдер түпкiлікті және оларды екi Уағдаласушы Тарап та орындауға мiндеттi болып табылады. Төрелiк сот өзiнiң процедуралық ережелерiн өзi белгілейтін болады. Ол Уағдаласушы Тараптардың кез келгенiнiң сұрау салуы бойынша өз шешiмiн түсiндiретiн болады. Арбитрлерге берiлетін сыйақыларды қоса алғанда, төрелiк сот iсiн жүргiзуге байланысты шығындар, егер сот ерекше жағдайларды ескере отырып, басқаша шешiм қабылдамайтын болса, Уағдаласушы Тараптар арасында теңдей етiлiп бөлiнедi.