Тармақ 1. Бiр Уағдаласушы Мемлекетте туындайтын және басқа Уағдаласушы Мемлекеттiң резидентiне төленетiн роялтиге осы басқа Мемлекетте салық салынуы мүмкiн. 2. Алайда, мұндай роялтиге, олар туындайтын Уағдаласушы Мемлекетте және осы Мемлекеттiң заңдарына сәйкес салық салынуы мүмкiн, бiрақ алушы роялтидiң iс жүзiндегi иесi бола отырып басқа Уағдаласушы Мемлекеттiң резидентi болып табылса, онда мұндай әдiспен алынатын салық роялтидiң жалпы сомасының 10 процентiнен аспауы тиiс. 3. "Роялти" термині осы бапта пайдаланғанда әдебиет, өнер және ғылым шығармаларына (кино, теле, бейнефильмдер немесе радио хабарлары мен теледидар үшін жазбалар, сондай-ақ бағдарламалық қамтамасыз ету), кез келген патентке, сауда маркасына, дизайнға немесе модельге, жоспарға, құпия формулаға немесе процеске немесе өнеркәсiптiк, коммерциялық немесе ғылыми тәжiрибеге қатысты ақпарат үшiн (ноу-хау) сыйақы ретiнде алынған төлемнiң кез келген түрiн және өнеркәсiптiк, коммерциялық немесе ғылыми жабдықтарды пайдаланғаны немесе пайдалану құқығын бергенi үшiн төленетiн төлемдердi бiлдiредi. 4. Егер роялтидiң iс жүзiндегi иесi Уағдаласушы Мемлекеттiң резидентi бола отырып роялти туындайтын басқа Уағдаласушы Мемлекетте онда орналасқан тұрақты мекеме (өкiлдiк) арқылы экономикалық (кәсiпкерлiк) қызметтi жүзеге асырса немесе сол басқа Мемлекетте орналасқан тұрақты базамен тәуелсiз жеке қызметтер көрсетсе және оған қатысты роялти төленетiн құқық немесе мүлiк Тұрақты мекемемен (өкiлдiкпен) немесе тұрақты базамен iс жүзiнде байланыста болса, осы Баптың 1 және 2-тармақтарының ережелерi қолданылмайды. Мұндай жағдайда, ретiне қарай осы Келiсiмнiң 7-бабының /Кәсiпкерлiк қызметтен алынатын пайда/ немесе 14-бабының /Тәуелсiз жеке қызметтер/ ережелерi қолданылады. 5. Егер төлеушi әкiмшiлiк бөлiмше, жергiлiктi өкiмет органы немесе осы Уағдаласушы Мемлекеттiң резидентi болып табылса, роялти Уағдаласушы Мемлекетте туындады деп есептеледi. Егер, алайда, роялти төлеушi тұлғаның Уағдаласушы Мемлекеттiң резидентi болып табылатындығына немесе табылмайтындығына қарамастан, Уағдаласушы Мемлекетте роялти төлеу мiндеттемесiнiң туындауына байланысты тұрақты мекемесi (өкiлдiгi) немесе тұрақты базасы болса және мұндай роялти осы тұрақты мекемемен (өкiлдiкпен) немесе тұрақты базамен байланысты болса, онда мұндай роялти тұрақты мекеме (өкiлдiк) немесе тұрақты база орналасқан Мемлекетте туындады деп есептеледi. 6. Егер проценттердi төлеушi мен оның iс жүзiндегi иесi арасында немесе сол екеуi мен қандай да бiр үшiншi тұлғаның арасындағы ерекше қатынастардың салдарынан, оның негiзiнде төленетiн пайдалануға, құқыққа немесе ақпаратқа жататын роялтидiң сомасы роялти төлеушi мен оның iс жүзiндегi иесi арасында мұндай қатынастар болмаған кезде келiсiле алатындай сомадан асып кетсе, онда осы баптың ережелерi тек соңғы аталған сомаға ғана қолданылады. Мұндай жағдайда төлемнiң басы артық бөлiгiне осы Келiсiмнiң басқа ережелерiн тиiсiнше ескере отырып, әрбiр Уағдаласушы Мемлекеттiң заңдарына сәйкес салық салынуға жатады. 7. Егер оған қатысты роялти төленетiн құқықтарды құруға немесе беруге байланысты кез келген тұлғаның негiзгi мақсаты немесе негiзгi мақсаттарының бiрi құқықтарды осындай құру немесе беру жолымен осы баптан пайда табу болса, осы баптың ережелерi қолданылмайды.