Тармақ 1. Екi не одан көп Уағдаласушы Тараптардың арасындағы осы Конвенцияны түсiндiруге немесе қолдануға қатысты кез келген дау мүмкiндiгінше олардың арасындағы келiссөздер жолымен немесе реттеудiң басқа да құралдарымен шешiледi.
Тармақ 2. Екi не одан көп Уағдаласушы Тараптардың арасындағы осы баптың 1-тармағында көзделген әдiстермен шешiлмейтiн осы Конвенцияны түсiндiруге немесе қолдануға қатысты кез келген дау олардың бiрiнiң өтiнiшi бойынша мынадай тұрғыда құрылған төрелiк сотқа берiледi: даудағы әр Тарап төрешi тағайындайды және бұл төрешiлер төраға болатын басқа төрешiнi тағайындайды. Егер өтiнiм алынған күннен бастап үш ай өткеннен кейiн Тараптардың бiрi төрешiнi тағайындамаса және төрешiлер төрағаны тағайындай алмаса, Тараптардың кез келгенi Бiрiккен Ұлттар Ұйымының Бас хатшысына төрешiнi немесе төрелiк соттың төрағасын тағайындау жөнiнде өтiнiшпен жүгiне алады. 2-тармақтың ережелерiне сәйкес тағайындалған төрелiк соттың шешiмi түпкiлiктi болып табылады және даудағы Тараптар үшiн мiндеттi күшi болады. Төрелiк сот өз рәсiмiнiң ережелерiн белгiлейдi. Төрелiк сот өз шешiмдерiн даудағы Тараптардың арасындағы шарттардың және жалпы халықаралық құқықтың негiзiнде көпшiлiк дауыспен қабылдайды. Даудағы Тараптар арасындағы төрелiк соттың шешiмдерiн түсiндiруге және орындауға қатысты пайда болуы мүмкiн кез келген келiспеушiлiктердi Тараптардың кез келгенi осы шешiмдi шығарған төрелiк соттың қарауына бере алады. Даудағы әр Тарап төрелiк талқылау кезiндегi өзi тағайындаған төрешi мен өз өкiлдерiнiң қызметтерiн пайдалануға байланысты шығындарды өтейдi; төрағаның қызметiн пайдалануға байланысты және басқа да шығындарды даудағы Тараптар тең бөлiкте өтейдi.