Осы Конвенция Уағдаласушы Мемлекеттің немесе оның жергілiктi өкiмет органдарының атынан алынатын табыс пен капиталға салынатын салықтарға оларды алу әдiсiне қарамастан қолданылады. 2. Жылжитын немесе жылжымайтын мүлiктi иелiктен шығарудан алынған табыстарға салынатын салықтарды, сондай-ақ капитал құнының өсуiнен алынатын салықтарды қоса, табыстың немесе капиталдың жалпы сомасынан немесе табыстың немесе капиталдың жеке бөлiктерiнен алынатын салықтардың барлық түрi табыс пен капиталға салынатын салықтар деп есептеледi. 3. Осы Конвенция қолданылатын, алынып жүрген салықтар, атап айтқанда, мыналар болып табылады: а) Қазақстан Республикасында: (I) заңды және жеке тұлғалар табысына салынатын салық; (II) заңды және жеке тұлғалар мүлкiне салынатын салық; (бұдан әрi - "Қазақстан салығы" деп аталады); b) Латвияда: (I) кәсiпорындар табысына салынатын салық (uznemumu ienakuma nodoklis); (II) жеке табыс салығы (iedzivotaju ienakuma nodoklis); (III) мүлiкке салынатын салық (ipasuma nodoklis); (бұдан әрi - "Латвия салығы" деп аталады). 4. Конвенция осы Конвенцияға қол қойылған күннен кейiн қолданылып жүрген салықтарға қосымша немесе солардың орнына алынатын бiрдей немесе мәнi бойынша ұқсас кез келген салықтарға да қолданылады. Уағдаласушы Мемлекеттердің құзыреттi органдары өздерiнің тиiстi салық заңдарына енгiзiлетiн кез келген елеулi өзгерiстер туралы бiрiн-бiрi хабардар етiп отырады.