Шарттың V бабы алынып тасталады және мыналармен ауыстырылады:
Тармақ 1. II бапта айқындалғанындай, қолданыс ауданы шегiнде, әрбiр Қатысушы мемлекет өздерiнің жауынгерлiк танктерiн, жауынгерлiк броньды машиналарын және артиллерияларын өз аумағында, сондай-ақ оның аумағында болуына рұқсат ететiн басқа Қатысушы мемлекеттердiң жауынгерлiк танктерінің, жауынгерлiк броньды машиналарының және артиллерияларының жалпы санын шектейдi, және әрбiр Қатысушы мемлекет басқа Қатысушы мемлекеттердің аумағында тұрған өздерiнiң жауынгерлiк танктерiн, жауынгерлiк броньды машиналарын және артиллерия бiрлiктерiн шектейдi сөйтіп, олардың жалпы саны, егер VII бапта өзге көзделмесе, осы бапқа және Аумақтық шектi деңгейлер туралы хаттамаға сәйкес белгiленген аумақтық шектi деңгейлерден және аумақтық шектi кiшi деңгейлерден аспайтын болады. 2. Біріккен Ұлттар Ұйымының Қауiпсiздiк Кеңесi немесе Еуропадағы қауіпсiздiк және ынтымақтастық жөнiндегi Ұйымы бұрыштамасының немесе шешiмiнiң негiзiнде және соған сәйкес өткiзiлетiн бiтiмгершiлiк операциялары үшiн Қатысушы мемлекеттiң аумағында тұрған жауынгерлiк танктер, жауынгерлiк броньды машиналар және артиллерия аумақтық шектi деңгейдің немесе сол Қатысушы мемлекеттiң аумақтық шектi кiшi деңгейінің есебiне кiрмейдi. Қатысушы мемлекеттің аумағындағы осы жауынгерлiк танктердiң, жауынгерлiк броньды машиналардың және артиллерияның болу ұзақтығы сондай бұрыштамаға немесе шешiмге сәйкес келедi. Осы тармаққа сәйкес өткiзiлетiн бiтiмгершiлiк операциясы үшiн Қатысушы мемлекеттің аумағында тұрған жауынгерлiк танктер, жауынгерлiк броньды машиналар және артиллерия туралы Ақпараттар алмасу туралы хаттамаға сәйкес хабарлама берiледi. 3. Транзитпен келетiн жауынгерлiк танктер, жауынгерлiк броньды машиналар және артиллерия, транзит арқылы жүзеге асырылатын Қатысушы мемлекеттердің аумақтық шектi деңгейінің және III баптың 1-тармағындағы (G) тармақшасында көзделген, есеп ережесiнен алып тастау үшiн нұқсан келмейтiн аумақтық шектi кішi деңгейiнiң есебiне: (А) қолданыс ауданы шегiнде жатқан пунктке транзитпен келетiн жауынгерлiк танктер, жауынгерлiк броньды машиналар және артиллерия, егер VII бапта өзге көзделмесе, соңғы мақсаттағы Қатысушы мемлекеттiң аумақтық шектi деңгейiн көтерудi көздемейдi. Қолданыс ауданының шегiнен тысқары жатқан пунктке, транзитпен келетiн жауынгерлiк танктер, жауынгерлiк броньды машиналар және артиллерия үшiн сандық шектеу белгiленбеген; (В) транзитпен келетiн жауынгерлiк танктер, жауынгерлiк броньды машиналар және артиллерия қолданыс ауданындағы транзит арқылы жүзеге асыратын Қатысушы мемлекеттердiң аумақтарында, жалпы алғанда 42 күннен аспайтын уақытқа қалған; және (С) транзитпен келетiн жауынгерлiк танктер, жауынгерлiк броньды машиналар және артиллерия транзит арқылы жүзеге асыратын кез келген дербес Қатысушы мемлекеттiң аумағында немесе қолданыс ауданындағы аумақтық шектi кiшi деңгейi бар аумақта 21 күннен аспайтын уақытқа қалған жағдайда алынбайды. Осы тармаққа сәйкес транзитпен келетiн жауынгерлiк танктерге, жауынгерлiк броньды машиналарға және артиллерияға Ақпараттар алмасу туралы хаттаманың XII бөлiмiне сәйкес хабарлама берiледi. Кез келген Қатысушы мемлекет ол туралы хабарлама берiлгеннен кейiн транзитке байланысты Бiрлескен консультациялық топтан түсiнiк сұрата алады. Оған қатысы бap Қатысушы мемлекеттер сұрау жасаған күннен бастап жетi күн ішіндe жауап бередi. 4. Әрбiр Қатысушы мемлекет мынадай жағдайда өзiнiң аумақтық шектi деңгейiн немесе аумақтық шектi кiшi деңгейiн өзгертуге құқылы: (А) Әрбiр Қатысушы мемлекет осы баптың 5-тармағына сәйкес кез келген санаттағы жауынгерлiк танктер, жауынгерлiк броньды машиналар және артиллерия үшiн өздерiнiң аумақтық шектi деңгейiн немесе аумақтық шектi кiшi деңгейiн арттыруға құқылы. Кез келген осындай арттыру - аумақтық шектi деңгейге немесе аумақтық шектi кiшi деңгейге сәйкес келетiн Аумақтық шектi деңгейлер туралы хаттаманың ережелерiн сақтай отырып, сол санаттағы бiр немесе бiрнеше басқа Қатысушы мемлекеттің аумақтық шектi деңгейiн немесе аумақтық шектi кiшi деңгейiн тиiсiнше төмендетумен алдын ала хабардар етiледi немесе қатар жүредi. Өздерiнің аумақтық шектi деңгейiн немесе аумақтық шектi кiшi деңгейiн тиiсiнше төмендетудi жүзеге асыратын Қатысушы мемлекет немесе Қатысушы мемлекеттер басқа Қатысушы мемлекеттiң аумақтық шектi деңгейiн немесе аумақтық шектi кiшi деңгейiн тиiсiнше арттыруға өздерiнiң келiсiмi туралы барлық Қатысушы мемлекеттердi хабардар етедi. (В) Әрбiр Қатысушы мемлекеттiң кез келген санаттағы жауынгерлiк танктерi, жауынгерлiк броньды машиналары және артиллериясы үшiн өздерінің аумақтық шектi деңгейiн немесе аумақтық шектi кiшi деңгейiн бiржақты тәртiппен төмендетуге құқылы; алайда санаттардың бiрде бiрiндегi бiрде-бiр аумақтық шектi деңгей қандай мезетте болсын тиiстi ұлттық шектi деңгейден төмен болуға тиiстi емес. Қатысушы мемлекеттiң аумақтық шектi деңгейiн немесе аумақтық шектi кiшi деңгейiн бiржақты төмендетуi басқа Қатысушы мемлекетке өздерiнiң аумақтық шектi деңгейiн немесе аумақтық шектi кiшi деңгейiн арттыру құқығына сылтау бола алмайды. IV баптың 6-тармағының ережелерiне сәйкес ұлттық шектi деңгейдi кез келген төмендету - ұлттық шектi деңгейдiң төмендеуiне тең мөлшердегi тиiсiнше аумақтық шектi деңгейдiң азаюына әкелiп соқтырады. 5. Жоғарыда баяндалған ережелердi сақтай отырып, XXI баптың 1-тармағына сәйкес өткiзiлетiн Қатысушы мемлекеттердiң конференциялары аралығындағы әрбiр бесжылдық кезең iшiнде әрбiр Қатысушы мемлекет өзiнің аумақтық шектi деңгейiн немесе аумақтық шектi кiшi деңгейiн 40 жауынгерлiк танктен, 60 жауынгерлiк броньды машинадан және 20 артиллерия бiрлiгiнен аспайтын мөлшерде, Аумақтық шектi деңгейлер туралы хаттамада осы Қатысушы мемлекет үшiн белгiленген жауынгерлiк танктерге, жауынгерлiк броньды машиналар мен артиллерияға арналған аумақтық шектi деңгейден немесе аумақтық шектi кішi деңгейден 20 %-ке, қайсысы көп болса, соған байланысты арттыруға құқылы, бiрақ кез келген жағдайда 150 жауынгерлiк танктен, 250 жауынгерлiк броньды машинадан және 100 артиллерия бiрлiгiнен аспауға тиiс. Әрбiр Қатысушы мемлекет басқа барлық Қатысушы мемлекеттер келiсiмiн берген жағдайда, осы тармақта көрсетiлген деңгейлерден тыс өздерiнің аумақтық шектi деңгейiн немесе аумақтық шектi кіші деңгейiн арттыруға құқылы. 6. Кез келген санаттағы өздерiнiң аумақтық шектi деңгейiн немесе аумақтық шектi кiшi деңгейiн өзгертуге тiлек бiлдiрген Қатысушы мемлекет осы хабарламада көрсетiлген сондай өзгерту iске қосылатын күннен кемiнде 90 күн бұрын барлық басқа Қатысушы мемлекеттердi хабардар етедi. Арттыруға барлық басқа Қатысушы мемлекеттердiң келiсiмi талап етiлетiн жағдайда, хабарлама берiлгеннен кейiн 60 күн iшінде бiрде-бiр Қатысушы мемлекет қарсылық бiлдiрмеген және барлық басқа Қатысушы мемлекеттер өздерiнiң қарсылығы туралы хабарламаған жағдайда, хабарламада көрсетiлген күннен бастап өзгерту күшiне енедi. Аумақтық шектi деңгей немесе аумақтық шектi кiшi деңгей осы шектi деңгейдiң немесе шектi кiшi деңгейдiң өзгерiсi қолданысқа енгенге дейiн сол қалпында қалады".