IV бапта және Ұлттық шектi деңгейлер туралы хаттамада көзделген сандық шектеуден тыс кез келген жауынгерлiк танктер, жауынгерлiк броньды машиналар, артиллерия, жауынгерлiк ұшақтар және соққы берушi тiкұшақтар Қысқарту туралы хаттамаға, Тiкұшақтарды қайта топтастыру туралы хаттамаға, Ұшақтарды қайта топтастыру туралы хаттамаға, Қолда бар түрлерi туралы хаттаманың 1-бөлiмiнiң 2-тармағындағы (А) тармақшасының ескертпесiне және Инспекциялар туралы хаттамаға сәйкес тек қысқарту жолымен таратылады. Қосылу жағдайында қосылатын мемлекет үшiн көзделген кез келген қысқартулар, сондай-ақ оларды жүзеге асыру мерзiмдерi қосылу туралы келiсiмнің ережелерiне сәйкес айқындалады. 2. Қысқарту аясына кiретiн кәдiмгi қару-жарақ пен техниканың санаттары жауынгерлiк танктер, жауынгерлiк броньды машиналар, артиллерия, жауынгерлiк ұшақтар және соққы берушi тiкұшақтар болып табылады. Нақты түрлерi Қолда бар түрлерi туралы хаттамада аталған. (А) Жауынгерлiк танктер мен жауынгерлiк броньды машиналар жою, әскери емес мақсаттар үшiн қайта жабдықтау, тұрақты экспозицияға орналастыру, жерүстiндегi нысаналар ретiнде пайдалану жолымен немесе бронетранспортерлерге қатысты Қолда бар түрлерi туралы хаттаманың 1-бөлiмi 2-тармағының (А) тармақшасындағы ескертуге сәйкес жетiлдiру жолымен қысқартылады. (В) Артиллерия жою немесе тұрақты экспозицияға орналастыру жолымен немесе өздiгiнен жүретiн артиллерияға қатысты жер үстiндегi нысаналар ретiнде пайдалану жолымен қысқартылады. (С) Жауынгерлiк ұшақтар жою, тұрақты экспозицияға орналастыру, жер үстiндегi оқу-жаттығудың материалдық бөлiгi ретiнде пайдалану жолымен немесе оқу-жауынгерлiк ұшақтардың үлгiлерi мен нұсқаларына қатысты қару-жарақты емес оқу-жаттығу ұшақтарын қайта топтастыру жолымен қысқартылады. (D) Арнайы жабдықталған соққы берушi тiкұшақтар жою, тұрақты экспозицияға орналастыру жолымен немесе жер үстiндегi оқу-жаттығудың материалдық бөлiгi ретiнде пайдалану жолымен қысқартылады. (Е) Көп мақсатты соққы берушi тiкұшақтар жою, тұрақты экспозицияға орналастыру, жер үстiндегi оқу-жаттығудың материалдық бөлiгi ретiнде немесе қайта топтастыру жолымен қысқартылады. 3. Шартпен шектелетiн кәдiмгi қару-жарақ пен техника осы баптың 1-тармағында аталған Хаттамада белгiленген және осы Хаттамалардың талаптарына сәйкес хабарлама ұсыну бойынша рәсiмдер жүзеге асырылғаннан кейiн қысқартылды деп саналады. Осылай қысқартылған қару-жарақ пен техника Ұлттық шектi деңгейлер туралы хаттама мен Аумақтық шектi деңгейлер туралы хаттаманың IV, V баптарында белгiленген сандық деңгейде есепке алынбайды. 4. Егер Хаттамаларда осы баптың 1-тармағында аталғаннан өзгеше айқындалмаса, Шартпен шектелетiн кәдiмгi қару-жарақ пен техниканы қысқарту қолданыс ауданы шегiндегi қысқарту орнында жүзеге асырылады. Әрбiр Қатысушы мемлекет қанша қаласа, сонша қысқарту орынын белгілеуге, олардың сондай орындарын белгiлеудi шектеусiз өзгертуге және бiр мезгiлде қысқарту мен соңғы қайта жабдықтауды ең көп дегенде 20 орында жүзеге асыруға құқылы. Қатысушы мемлекеттер қысқарту орындарын бiрлесiп пайдалануға немесе оларды өзара келiсiм бойынша орналастыруға құқылы. 5. Кез келген қысқартулар, Шартпен шектелетiн кәдiмгi қару-жарақ пен техниканы қайта жабдықтау нәтижесiн қоса алғанда, әскери емес мақсаттар үшін Инспекция туралы хаттамаға сәйкес бас тарту құқығынсыз инспекцияға жатады.