Тағайындалған әрбiр авиакәсiпорынға екiншi Тарап мемлекетiнiң аумағында авиатасымалдар бойынша қызметтер көрсетудi тiкелей немесе өз қалауы бойынша, өзiнiң агенттерi арқылы сатуды жүзеге асыру құқығы берiлетiн болады. Тағайындалған әрбiр авиакәсiпорынның өзiнiң авиакөлiктiк қызметтер көрсетуiн жергiлiктi немесе басқа елдердiң еркiн айналымдағы валютасында еркiн сатуға құқығы болады. Кез келген тұлға тасымалдау жөнiндегi мұндай қызметтер көрсетудi осы авиакәсiпорынның сатуы үшiн қолайлы валютада еркiн сатып алатын болады. 2. Әрбiр Тарап екiншi Тарап мемлекетiнiң тағайындалған авиакәсiпорындарына өзiнiң мемлекетi аумағында бұл авиакәсiпорындар алған кiрiстердiң шығыстардан артылған сомасын еркiн аударуға құқық бередi. Мұндай аударулар ағымдық төлемдер үшiн айырбастың ресми бағамы негiзiнде немесе, егер ағымдық төлемдер үшiн ресми айырбас бағамы жоқ болса, екiншi Тараптың тағайындалған авиакәсiпорындарының аударым туралы сұрау салған күнiне қолданылатын ағымдық төлемдер рыногының басымдық айырбас бағамы бойынша жүзеге асырылады және қызмет көрсетулер үшiн мұндай аударуларда банктер алатын жай алымдарды қоспағанда, алымдар салынбайды. 3. Әрбiр Тарап өзара кепiлдiк негізiнде екiншi Тараптың тағайындалған кәсiпорындарын бiрiншi Тарап аумағында осы кәсiпорындар тапқан кiрiстер мен табыстарға салық салудың кез келген нысанынан, сондай-ақ айналым немесе капиталға арналған кез келген салықтардан босататын болады. Егер Тараптар арасында осындай босатуды көздейтiн Қосарланған салық салуды болдырмау туралы конвенция қолданылатын болса, бұл ереже қолданылмайды.