Бап 26 О кредитных бюро и формировании кредитных историй в Республике Казахстан

Тармақ 1. Осы Заңның 18-бабы 1-тармағының 3-1) және 3-2) тармақшаларында көрсетілген ақпарат берушілерді қоспағанда, ақпарат берушілердің кредиттік бюроларға (мемлекет қатысатын кредиттік бюроны қоспағанда) ақпарат беруі, сондай-ақ кредиттік бюролардан кредиттік есептерді беруі үшін кредиттік тарих субъектісінің келісімі негіз болып табылады.

Тармақ 2. Кредиттiк есептi алушылар кредиттiк бюролар жүйесiндегi ақпаратты:

• 1) кредиттер беру, мониторинг жасау және кредиттердiң мерзiмiн ұзарту кезiнде тәуекелдердi бағалау;
• 1-1) кредиттік тарих субъектiсiнің кредит өтеу қабілетiн бағалау;
• 2) кредиттiк шарттардың талаптары өзгерген кезде тәуекелдердi бағалау;
• 3) мерзiмi ұзартылған төлемдермен жасалатын өзге де мәмiлелер бойынша тәуекелдердi бағалау;
• 4) кредиттік есептегi ақпараттың дұрыстығын растау;
• 5) осы Заңның 20-бабы 1-тармағының 3) тармақшасында көрсетілген кредиттік есептерді алушылар қызметті жүзеге асырған кезде тәуекелдерді бағалау мақсатында пайдалануы мүмкін.

Тармақ 3. Кредиттік бюролар ақпарат берушiлерден алған мәлiметтердi өздерінің маркетингтiк, талдамалық және статистикалық зерттеулердi жүзеге асыруы үшiн пайдалануға құқылы.

Тармақ 4. Уәкілетті орган мен шет мемлекеттің тиісті қадағалау органы арасында ақпарат алмасу жөніндегі келісім болған кезде, кредиттік бюро шет мемлекеттердің кредиттік бюроларына субъектінің кредиттік тарихы бар немесе жоқ екендігі туралы ақпарат беруге және олардан ақпарат алуға құқылы.

Тармақ 5. Трансшекаралық алмасу шет мемлекеттердің уәкілетті ұйымдары мен кредиттік бюролардың өзара іс-қимылы арқылы олардың арасында жасалған, уәкілетті органмен келісілген трансшекаралық алмасу туралы шарттардың талаптарымен жүзеге асырылады.

Тармақ 6. Трансшекаралық алмасу туралы шартта трансшекаралық алмасуды жүзеге асырудың мынадай талаптары қамтылады:

• 1) ақпараттық өзара іс-қимыл қағидалары мен регламенттері;
• 2) ақпарат қалыптастырылатын және берілетін тіл;
• 3) электрондық құжаттар мен мәліметтердің форматтары мен құрылымдарының сипаттамасы;
• 4) сәйкестендіру деректерінің тізбесі (құрамы);
• 5) дауларды реттеу тәртібі, оның ішінде кредиттік тарих субъектісінің кредиттік тарихтардың құрамына кіретін мәліметтерді даулау тәртібі;
• 6) ақпарат берудің қаржылық шарттары;
• 7) ақпаратты қорғауды ұйымдастырушылық-техникалық қамтамасыз етуге қойылатын талаптар;
• 8) трансшекаралық алмасуды жүзеге асыру үшін қажетті басқа да шарттар.

Тармақ 7. Трансшекаралық алмасу кредиттік тарих субъектісінің трансшекаралық алмасуға келісімі болған кезде жүзеге асырылады, келісім ұсынылған күнінен бастап алты ай ішінде жарамды болады.

Тармақ 8. Өздеріне қатысты трансшекаралық алмасу жүзеге асырылатын мәліметтер мен өзге де ақпаратта мыналар қамтылады:

• 1) кредиттік есепті ұсыну туралы сұрау салу;
• 2) кредиттік тарих субъектісінің трансшекаралық алмасуға келісімі;
• 3) кредиттік есеп;
• 4) кредиттік тарихтар құрамына кіретін мәліметтерді даулауға қатысты құжаттар.

Тармақ 9. Уәкілетті ұйымдар мен кредиттік тарихты пайдаланушы трансшекаралық алмасуды жүзеге асыру кезінде өздеріне қатысты трансшекаралық алмасу жүзеге асырылатын мәліметтер мен ақпаратты өңдеу, сақтау және беру кезінде олардың қорғалуын қамтамасыз етуге міндетті.

Тармақ 10. Кредиттік тарихты пайдаланушы трансшекаралық алмасу кезінде алынған ақпарат пен мәліметтерді тек қана кредиттік қатынастарды ресімдеу және (немесе) ресімделген кредиттік қатынастарды мониторингтеу мақсатында пайдалануы мүмкін.