Тармақ 1. Банк халықаралық ұйым - халықаралық құқық субъектiсi болып табылады, халықаралық құқықтық қабiлетке ие және атап айтқанда, өз құзыретi шегiнде халықаралық шарттар жасасуға құқығы бар. 2. Банк Банкке қатысушылардың аумағындағы заңды тұлғаның құқықтарын пайдаланады және атап айтқанда, мыналарға: а) Банктiң Жарғысына қайшы келмейтiн кез келген мәмiлелер жасасуға; б) жылжымалы және жылжымайтын мүлiктi жалға алуға, сатып алуға және иелiктен айыруға, сондай-ақ көрсетiлген мүлiкке өзге де тәсiлмен билiк етуге; в) сот және төрелiк органдарда сөз алуға құқылы. Банкке қатысушы мемлекеттердiң аумағында Банк үшiн Банкке қатысушы мемлекеттердiң заңнамасында заңды тұлғаларға бекiтiлген өз мүдделерiн қорғау үшiн дәл сондай iс жүргiзу құқықтары танылады; г) осы Жарғыға сәйкес Банктiң мақсаттарына қол жеткiзуге бағытталған басқа да iс-әрекеттер жасауға құқылы. 3. Банк өз қатысушыларының мiндеттемелерi бойынша жауап бермейдi, ал Банкке қатысушылар Банктiң мiндеттемелерi бойынша жауап бермейдi. Банкке қатысушылар оларға тиесiлi акциялар құнының шегiнде Банктiң қызметiне байланысты залалдың тәуекелдiгiне тәуелдi болады. 4. Банктiң орналасқан жерi: Қазақстан Республикасы, Алматы қаласы. 5. Банкке қатысушы мемлекеттердiң аумағында Банктiң қызметi қолданылатын халықаралық шарттарда, Келiсiмде, осы Жарғыда, Банк Банкке қатысушы мемлекеттердiң үкiметтерiмен Банктiң олардың аумағында болу шарттары туралы, сондай-ақ Банкке қатысушы мемлекеттердiң орталық (ұлттық) банктерiмен және өзге де уәкiлеттi органдарымен жасасқан келiсiмдерде, ал олар болмаған жағдайда не көрсетiлген құжаттармен реттелмеген бөлiгiнде осындай қызмет жүзеге асырылатын аумақтарда Банкке қатысушы мемлекеттердiң заңнамасымен айқындалады. Банкке қатысушы мемлекеттердiң ұйымдар құру, қызметiн лицензиялау, реттеу және тоқтату тәртiбiн белгiлейтiн заңнамасы Банкке қолданылмайды. 6. Банк кеңесiнiң шешiмi бойынша және Банкке қатысушылармен келiсiм бойынша Банк филиалдар және (немесе) өкiлдiктер ашуға, сондай-ақ еншiлес банктер мен ұйымдарды құруға құқылы.