Бастапқы жазылу жарияланған акцияларға ақы төлеу атаулы құны бойынша жүзеге асырылады. 2. Банктiң әрбiр құрылтайшысы осы Жарғыға қосымшаға сәйкес сол құрылтайшыға берiлетiн жарғылық капитал акцияларының кемiнде 20 (жиырма) пайызын құрылтайшы осы Жарғы күшiне енген жылдан кейiнгi жылға арналған өз бюджетiн атқаруын бастаған күнiнен бастап 30 (отыз) күннен кешiктiрмей төлейдi. 3. Бастапқы жазылудың қалған бөлiгiнiң есебiне Банктiң әрбiр құрылтайшысы тең үлестермен жыл сайын 2 (екi) жыл iшiнде өтелетiн ақы төлеу бойынша мiндеттемелердi ресiмдейдi, олардың бiрiншiсi осы баптың 2-тармағына сәйкес жасалған төлемнен кейiн 12 (он екi) айдан кешiктiрмей төленуге тиiстi. 4. Осы баптың 2-тармағына сәйкес Банктiң жарғылық капиталын қалыптастыру үшiн бастапқы жарнаны төлеу Келiсiмге қол қойылған күннен бастап мерзiмiнен бұрын жүргiзiлуi мүмкiн. Бұл ретте Банктiң жарғылық капиталын қалыптастыру үшiн ақы төлеу Қазақстан Республикасы Ұлттық Банкiндегi уақытша жинақтау шотына есепке алынады. Құрылтайшының Банктiң жарғылық капиталына төленетiн жарна жөнiндегi мiндеттемелерi қаражатты уақытша жинақтау шотынан осы Жарғының 9-тармағына сәйкес ашылған Банктiң шотына аударылғаннан кейiн орындалған болып есептеледi. 5. Банктiң жарғылық капиталының акцияларына ақы төлеудi Банкке қатысушылар мерзiмiнен бұрын жүргiзуi мүмкiн. 6. Егер осы баптың 3-тармағында айтылған 2 (екi) жыл iшiнде құрылтайшылардың қайсыбiрi бастапқы жазылу бойынша акцияларды толық төлемесе, Банк кеңесi Банктiң басқа қатысушыларының төленбеген акцияларды сатып алу тәртiбiн белгiлейдi. Бұл құқықтан барлық қатысушылар бас тартқан жағдайда, Банк кеңесi акцияларды жазылуға қайта ұсынуға немесе жарғылық капиталды тиiстi тәсiлмен азайтуға шешiм қабылдайды. 7. Акцияларға ақы төлеу АҚШ долларымен жүргiзiледi. 8. Банкке қатысушы акциялардың бiр бөлiгiн төлеу ретiнде Банк кеңесi көздеген тәртiппен және шарттарда жиынтық құны Банктiң жарғылық капиталындағы оның үлесiнiң 10 (он) пайызынан аспауға тиiс ақшалай емес салым (мүлiк) енгiзе алады. Банктiң жарғылық капиталына жарна ретiнде берiлетiн мүлiкке мiндеттемелер жүктелмейдi. Салынатын мүлiк құнын Банк кеңесi анықтайтын тәуелсiз бағалау ұйымы белгiлейдi және оны Банк кеңесi бекiтедi. 9. Банк құрылтайшыларының акцияларды төлеуiнен түскен қаражат Банктiң Қазақстан Республикасы Ұлттық Банкiндегi шотына есептеледi.