Тармақ 1. Заңды тұлғалар өздерi қарыз алушы ретiнде әрекет ететiн қарыздар бойынша мемлекет кепiлгерлiгiн алуға үмiткер болғанда осы заңды тұлғаларға мынадай талаптар қойылады: 1) кәсiпкерлiк қызметтi жүзеге асыратын Қазақстан Республикасының резидентi болу; 2) бюджеттi атқару жөнiндегi орталық уәкiлеттi орган қаржы нарығын және қаржылық ұйымдарды реттеу мен қадағалауды жүзеге асыратын уәкiлеттi органмен келiсе отырып белгiлейтiн, мемлекет кепiлгерлiгiмен тартылған қарыздардың қайтарымдылығын қамтамасыз ету талаптарын қанағаттандыратын сақтандыру шарты болуы; 3) тиiстi саланың уәкiлеттi органының оң қорытындысының болуы; 4) бюджеттi атқару жөнiндегi орталық уәкiлеттi органның оң қорытындысының болуы; 5) экономикалық жоспарлау жөнiндегi орталық уәкiлеттi органның оң қорытындысының болуы; 6) бюджеттiк жоспарлау жөнiндегi орталық уәкiлеттi органның оң қорытындысының болуы; 7) төлем мерзiмдерi басталған, мемлекет кепiлгерлiгiмен не мемлекеттiк кепiлдiктерiмен бұрын алынған қарыздарды өтеу және оларға қызмет көрсету бойынша берешегiнiң, сондай-ақ кредиторлар алдында өзге де мерзiмi өткен берешегiнiң болмауы. 2. Қазақстан Республикасының Үкiметi мемлекет кепiлгерлiгiн алуға үмiткер тұлғаларға мемлекеттiк емес қарыздың шарттарына және инвестициялық жобаның тәуекелiне байланысты қойылатын қосымша талаптар белгiлеуi мүмкiн.