Тармақ 1. Мемлекет балалардың денсаулығын сақтауды қамтамасыз етедi, олардың дене бiтiмi, ақыл-ойы, рухани, адамгершiлiк және әлеуметтiк дамуы үшiн қажеттi өмір сүру жағдайларына құқықтарын iске асырады.
Тармақ 2. Мемлекеттiк органдар, жұмыс берушiлер арнаулы медициналық және балаларды оңалту, сауықтыру ұйымдарының желiсiн дамытуды қамтамасыз етедi және олардың қызметi үшiн қажеттi жағдайлар жасайды.
Тармақ 3. Балалардың мiндеттi мерзiмдiк медициналық тексерiп-қараудан өтiп тұруға және тұрақты диспансерлiк бақылауда болуға, тегiн медициналық көмектiң кепiлдi көлемi шеңберiнде емделуге және сауықтырылуға құқығы бар.
Тармақ 4. Амбулаториялық емдеу кезiнде балалардың жекелеген санаттары аурулардың кейбiр түрлерi бойынша Қазақстан Республикасының дәрiлiк заттар туралы заңнамасында көзделген тәртiппен дәрiлiк заттармен қамтамасыз етiледi.
Тармақ 5. Балаларды стационарлық емдеу кезiнде: 1) дәрiгерлердiң қорытындысы бойынша қосымша күтiп-бағуға мұқтаж үш жасқа дейiнгi балаларды күтiп-бағуды тiкелей жүзеге асыратын анасына (әкесiне) немесе өзге адамға ауырып қалған баланы күтiп-бағуға байланысты уақытша еңбекке жарамсыздық туралы парақ немесе анықтама берiлiп, онымен медициналық ұйымда бiрге болу мүмкiндiгi жасалады. Бiреудiң күтiп-бағуына мұқтаж үш жастан асқан балалар ауруларының тiзбесiн Қазақстан Республикасының Үкiметi белгiлейдi ;
Тармақ 6. Мектеп жасындағы балалар стационарлық, қалпына келтiру, санаториялық емделу кезеңiнде стационар, оңалту орталығы, санаторий жағдайында үздiксiз бiлiм алуға құқылы.
Тармақ 7. Мүмкiндiгi шектеулi балалардың, сондай-ақ АҚТҚ инфекциясын жұқтырған, ЖҚТБ-мен ауыратын, кәмелетке толмаған балалардың бiлiм беру, денсаулық сақтау, халықты әлеуметтiк қорғау ұйымдарында тегiн әлеуметтiк және медициналық-педагогикалық түзеу арқылы қолдау алуға құқығы бар.
Тармақ 8. Балалардың өздерiнiң денсаулығын қорғау саласында бiлiм алуға және тәрбиеленуге құқығы бар.
Тармақ 9. АҚТҚ инфекциясын жұқтырған балалардың балалар үйлерi мен жалпы мақсаттағы оқу-тәрбиелеу ұйымдарында болуға құқығы бар.