Тармақ 1. Нарық субъектiлерiнiң өзiнiң үстем (монополиялық) жағдайын терiс пайдалану мүмкiндiгiн немесе бәсекенi шектеудi болдырмау мақсатында монополияға қарсы органның осы Заңның 12-бабында көзделген мәмiлелердi (iс-әрекеттердi) жүзеге асыруға алдын ала келiсiмiн алу түрiнде көрiнетiн экономикалық шоғырлануға мемлекеттiк бақылауды монополияға қарсы орган жүзеге асырады.
Тармақ 2. Егер тиiстi мәмiлелерге қатысушы тұлғалар активтерiнiң баланстық құны немесе соңғы қаржы жылында өткiзiлген тауарлардың жиынтық көлемi айлық есептiк көрсеткiштiң бiр жарым миллион есе мөлшерiнен асса немесе олардың бiреуi тиiстi тауар нарығында үстем (монополиялық) жағдайға ие нарық субъeктici болып табылса, не осы тармақта аталған нарық субъектiлерiнiң қызметiн бақылайтын тұлғалар тобы иеленушi болған жағдайларда осы Заңның 12-бабының 1-тармағының 3), 4), 5) және 6) тармақшаларында аталған мәмiлелердi жүзеге асыруға монополияға қарсы органның алдын ала келiсiмi талап етiледi. Монополияға қарсы орган тиiстi тауар нарықтарына талдау жасау негізінде осы тармақта аталған мәмілелерді жүзеге асыруға монополияға қарсы органның алдын ала келiсiмi қажет нарықтар үшiн активтер құны мен тауарлар өткiзу көлемiнiң неғұрлым жоғары мөлшерiн белгiлеуге құқылы.
Тармақ 3. Егер қаржы ұйымы активтерiнiң құны не жеке өз капиталының шамасы уәкiлеттi орган қаржы нарығын және қаржы ұйымдарын реттеу мен қадағалауды жүзеге асыратын мемлекеттiк органмен бiрлесiп белгiлеген мөлшерден асатын болса, қаржы ұйымдары қатысатын экономикалық шоғырлануға рұқсат алу жүзеге асырылады.
Тармақ 4. Осы баптың 2-тармағына сәйкес тауарларды (жұмыстарды, қызмет көрсетулердi) өткiзу көлемдерiн есептеген кезде экономикалық шоғырлануға рұқсат беру туралы өтiнiш берiлген жылдың алдындағы соңғы қаржы жылы үшiн қосылған құн салығының және акциздiң сомасы шегерiлiп, тауарларды (жұмыстарды, қызметтер көрсетудi) өткiзуден түскен табыс (ақшалай түсiм) сомасы пайдаланылады.
Тармақ 5. Егер нарық субъектiсi экономикалық шоғырлануға рұқсат беру туралы өтiнiш берiлген жылдың алдындағы соңғы қаржы жылынан кем мерзiм iшiнде жұмыс iстеген болса, осы баптың 2-тармағына сәйкес тауарларды (жұмыстарды, қызметтер көрсетудi) өткiзу көлемдерiн есептеген кезде экономикалық шоғырлануға рұқсат беру туралы өтiнiш бергенге дейiнгi, бiрақ бiр жылдан аспайтын уақыт iшiнде алынған кiрiс сомасы пайдаланылады.
Тармақ 6. Осы Заңның 12-бабының 1-тармағының 1) - 4) тармақшаларында көзделген жағдайларда тiркеушi орган нарық субъектiлерiн мемлекеттiк тiркеудi, қайта тiркеудi монополияға қарсы органның алдын ала келiсiмiмен жүзеге асырады. Осы бап бұзылып жүзеге асырылған нарық субъектiлерiн мемлекеттiк тiркеу, қайта тiркеу монополияға қарсы органның талап қоюы бойынша сот тәртiбiмен жарамсыз деп танылуы мүмкiн.
Тармақ 7. Монополияға қарсы органның рұқсатынсыз жасалған экономикалық шоғырлануды монополияға қарсы органның талап қоюы бойынша сот жарамсыз деп тануы мүмкiн.