Бап 1 О ратификации Протокола о единых правилах лицензирования импорта и экспорта товаров, а также связанных с этим отдельных видов деятельности государств-членов Евразийского экономического сообщества
Осы Хаттаманың мақсаттары үшiн мынадай ұғымдар пайдаланылады:
1) сыртқы сауда қызметi - тауарлармен, қызметтермен, ақпаратпен және зияткерлiк меншiкпен сыртқы сауда саласындағы мәмiлелердi жүзеге асыру жөнiндегi қызмет;
2) бас лицензия - Тараптардың шешiмдерi негiзiнде сыртқы сауда қызметiне қатысушыларға берiлетiн және лицензияда айқындалған санда лицензияланатын жекелеген тауарлар түрiнiң экспортына немесе импортына құқық беретiн лицензия;
3) тауар импорты - ЕурАзЭҚ-қа мүше мемлекеттiң кедендiк аумағына қайта әкету туралы мiндеттемесiз тауарларды әкелу;
4) ерекше лицензия - жекелеген тауар түрiнiң экспортына немесе импортына ерекше құқық беретiн лицензия;
5) лицензия және (немесе) рұқсат - тауарлардың не осыған байланысты жекелеген қызмет түрлерiнiң импортын және (немесе) экспортын жүзеге асыру құқығына арналған арнайы құжат;
6) лицензиялау - тауарлардың не осыған байланысты жекелеген қызмет түрлерiнiң импортын және (немесе) экспортын жүзеге асыру құқығына арналған лицензияларды және (немесе) рұқсаттарды беру тәртiбiн белгiлейтiн әкiмшiлiк шаралардың кешенi;
7) қадағалау - жекелеген тауар түрлерiнiң импорты және (немесе) экспорты серпiнiнiң мониторингi мақсатында белгiленген уақытша шара;
8) бiр жолғы лицензия - мәнi лицензияланатын тауар болып табылатын сыртқы сауда мәмiлесi негiзiнде сыртқы сауда қызметiне қатысушыға берiлетiн және осы тауардың белгiлi бiр сандағы экспортына немесе импортына құқық беретiн лицензия;
9) рұқсат беру тәртiбi - лицензиялауды немесе сыртқы сауда қызметiн реттеудiң әкiмшiлiк шараларының өзге нысандарын көздейтiн жекелеген тауарлар түрлерiмен сыртқы сауда операцияларын, сондай-ақ ЕурАзЭҚ-қа мүше мемлекеттердiң аумағынан тысқары тасымалданатын осындай тауарларды кедендiк бақылау мен кедендiк ресiмдеудi жүзеге асырудың тәртiбi;
10) тауар - сыртқы сауда қызметiнiң мәнi болып табылатын жылжымалы мүлiк, жылжымайтын мүлiкке жатқызылған әуе, теңiз кемелерi, iшкi жүзу және аралас (өзен - теңiз) жүзу кемелерi мен ғарыш объектiлерi, сондай-ақ электр энергиясы және энергияның басқа да түрлерi. Халықаралық тасымалдар туралы шарт бойынша пайдаланылатын көлiк құралдары тауар ретiнде қарастырылмайды;
11) ЕурАзЭҚ-тың сыртқы сауда қызметiне қатысушылар (бұдан әрi - сыртқы сауда қызметiне қатысушылар) - ЕурАзЭҚ-қа мүше мемлекеттiң заңнамасына сәйкес құрылған заңды тұлғалар , ЕурАзЭҚ-қа мүше мемлекеттiң азаматтары болып табылатын ЕурАзЭҚ-қа мүше мемлекеттiң аумағында тұрақты немесе басымдықты тұрғылықты орны бар немесе ЕурАзЭҚ-қа мүше мемлекетте тұрақты тұруға құқығы бар не ЕурАзЭҚ-қа мүше мемлекеттiң заңнамасына сәйкес дара кәсiпкерлер ретiнде тiркелген жеке тұлғалар;
12) тауар экспорты - ЕурАзЭҚ-қа мүше мемлекеттiң кедендiк аумағынан керi қайтару туралы мiндеттемесiз тауарды әкету.