Тармақ 1. Сайлауға дайындық және оны өткізу ашық және жария жүргізіледі. 2. Өздерінің құзырлы шегінде және сайлауды тағайындауға, оған дайындалуға және өткізуге, азаматтардың сайлау құқықтары мен бостандықтарын қамтамасыз етуге және қорғауға байланысты мемлекеттік билік органдарының, жергілікті өзін-өзі басқару органдарының, сайлау органдарының шешімдері заңдарда көзделген тәртіпте және мерзімде міндетті түрде ресми жариялауға жатады, не болмаса өзгедей жолмен жалпы жұрттың назарына жеткізіледі. 3. Азаматтардың сайлау құқықтарын, бостандықтары мен міндеттерін қозғайтын құқықтық актілер мен шешімдер, егер олар жалпы жұрт назарына жеткізу үшін ресми жарияланбаса қолданылмайды. 4. Сайлау органы сайлау туралы заңнамада белгіленген мерзімнің ішінде өзінің баспа органында немесе өзге де бұқаралық ақпарат құралдарында дауыс берудің нәтижелері туралы деректерді, сондай-ақ сайланған адамдар туралы мәліметтерді ресми жария етеді. 5. Сайлаудың ашықтығы мен жариялылығы принципін сақтау сайлауға қоғамдық және халықаралық бақылау жүргізуді жүзеге асыру үшін жағдайлар жасауды қамтамасыз етуі тиіс.