Әкімшілік шараларды аяқтау НАТО-ға мүше емес ақпарат алушының тиісті ведомстволарының Қауіпсіздік жөніндегі басқармасы жүргізетін құпиялылық режимін тексеру нәтижесімен расталуы тиіс. Құпиялылық режимін тексеру НАТО-ға мүше емес ақпарат алушының Қауіпсіздік және ең аз стандарттар жөніндегі келісімнің талаптарына сәйкес келу қабілеттілігін белгілеуі тиіс. 41. Қауіпсіздік жөніндегі басқарма құпиялылық режимін тексеру жөнінде есепті жасауы және НАТО-ға мүше емес ақпарат алушыға Қауіпсіздік жөніндегі басшылық құжаттың көшірмесін беруі тиіс. Баянаттың түпнұсқасы Қауіпсіздік жөніндегі басқармада сақталуы және НАТО-ға мүше елдердің пайдалануы үшін рұқсатты болуы тиіс. Қауіпсіздік жөніндегі басқарма НАТО-ға мүше емес ақпарат алушының НАТО құпия ақпаратын қорғау қабілеттілігіне қатысты баянат негізінде жасалған қорытындыны НАТО-ның тиісті органдарына және НАТО-ға мүше елдерге хабарлауы тиіс. 42. Ақпарат қауіпсіздігі жөніндегі тиісті нұсқаулықтар басқаларды қоса, мыналарды қамтиды: (а) НАТО-ға мүше емес ақпарат алушыға НАТО құпия ақпаратын беру жөніндегі рәсімдер; (b) НАТО-ның өндірістік және тылдық қамтамасыз ету жөніндегі ұйымдары (NРLО), халықаралық ұйымдар және көп ұлтты біріккен жедел-тактикалық топтар (СJTF) үшін ерекше тарату рәсімдері; (с) НАТО-ға мүше емес ақпарат алушыға берілген НАТО құпия ақпаратының айналымы және оны қорғау үшін талап етілетін ең аз стандарттар. НАТО-мен қауіпсіздік туралы Келісімді жасамағанына немесе НАТО-ға қауіпсіздік жөнінде кепілдеме бермегеніне қарамастан, кез келген НАТО-ға мүше емес ақпарат алушыға қолданылатын ең аз стандарттар; (d) барлық НАТО-ға мүше емес ақпарат алушылар орындауы тиіс нақты әкімшілік шаралар; және (е) қауіпсіздік кепілдемесінің, НАТО құпия ақпараттарымен жұмыс істеуге рұқсат беру үшін жеке құрамның сенімділігі туралы сертификаттың үлгілері және құпия ақпаратпен жұмыс істеуге рұқсат туралы сертификат.