Тармақ 1. Аукционға қатысуға тілек білдірген әлеуетті өнім берушінің мемлекеттiк сатып алуды ұйымдастырушыға табыс ететін аукционға қатысуға өтiнiм мемлекеттiк сатып алу веб-порталында электрондық құжат түрінде қалыптастырылады және аукциондық құжаттамада тізбеленген қағаз құжаттардың электрондық көшірмелерін және (немесе) электрондық құжаттарды қамтитын екі бөліктен тұрады. 2. Аукционға қатысуға өтінімнің бірінші бөлігі: 1) тауарды мемлекеттік сатып алу кезінде, қажет болған жағдайда нормативтік-техникалық құжаттаманы көрсете отырып, сатып алынатын тауардың сипаты мен ұсынылатын техникалық, сапалық және пайдалану сипаттамасын (тауар таңбасын, қызмет көрсету белгісін, фирмалық атауын, тауар шығарылған жердің атауын және өндірушінің атауын көрсете отырып, сондай-ақ егер аукциондық құжаттама сатып алынатын тауардың эскиздерін, суреттерін, сызбаларын, фотосуреттері мен өзге де бейнелерін беру туралы талапты көздеген жағдайда, онда аукционға қатысуға өтiнiмде осындай ақпарат қамтылуға тиіс); 2) жұмысты, көрсетілетін қызметті мемлекеттік сатып алу кезінде әлеуетті өнім берушінің аукциондық құжаттамада көзделген талаптарға сәйкес жұмысты орындауға, қызметті көрсетуге келісімін; 3) аукционға қатысуға өтiнiмді қамтамасыз етуді мемлекеттік сатып алуды ұйымдастырушының банктік шотында не мемлекеттік органдар мен мемлекеттік мекемелер болып табылатын мемлекеттік сатып алуды ұйымдастырушылар үшін Қазақстан Республикасының бюджет заңнамасында көзделген шотта орналастырылатын кепілдікті ақшалай жарна түрінде енгізген жағдайда, кепілдікті ақшалай жарнаны растайтын төлем құжатының электрондық көшірмесін қамтуға тиіс. Аукционға қатысуға өтiнiмді қамтамасыз етуді банктік кепілдік түрінде енгізген кезде оның түпнұсқасы электрондық мемлекеттік сатып алуды өткізу қағидаларында көзделген тәртіппен, аукционға қатысуға өтiнiмдер табыс етудің соңғы мерзіміне дейін мемлекеттік сатып алуды ұйымдастырушыға беріледі. 3. Аукционға қатысуға өтiнiмнің екінші бөлігі әлеуетті өнім берушінің және ол тартатын қосалқы мердігерлердің (бірлесіп орындаушылардың) осы Заңның 8-бабында көзделген біліктілік талаптарына сәйкестігін растайтын құжаттарды қамтуға тиіс. Аукционға қатысуға өтiнiмді оларды табыс етудің аукциондық құжаттамада көрсетілген соңғы мерзімі өткеннен кейін табыс етуге жол берілмейді. 4. Аукционға қатысуға өтiнiмдерді белгiленген мерзiм өткенге дейiн табыс еткен әлеуетті өнім берушілер мемлекеттiк сатып алу веб-порталында хронологиялық тәртіппен тіркеледі. 5. Әлеуетті өнім беруші аукционға қатысуға өтiнiмдерді табыс ету мерзiмi аяқталатын кезден кешiктiрмей: 1) аукционға қатысуға енгiзiлген өтiнiмдi өзгертуге және (немесе) толықтыруға; 2) аукционға қатысуға өтiнiмнің өзi енгiзген қамтамасыз етілуін қайтарып алу құқығын жоғалтпастан, өзiнiң аукционға қатысуға өтiнiмiн керi қайтарып алуға құқылы. Аукционға қатысуға өтiнiмдерді табыс етудің соңғы мерзiмi өткеннен кейiн оған өзгерiстер және (немесе) толықтырулар енгiзуге, сол сияқты аукционға қатысуға өтiнiмдi керi қайтарып алуға жол берiлмейдi. 6. Әлеуетті өнім беруші аукцион тәсілімен мемлекеттік сатып алуға өзінің қатысуына байланысты барлық шығыстарды көтереді. Тапсырыс беруші, мемлекеттік сатып алуды ұйымдастырушы, мемлекеттік сатып алуды бірыңғай ұйымдастырушы, аукциондық комиссия, сараптама комиссиясы, сарапшы, электрондық мемлекеттік сатып алу саласындағы бірыңғай оператор аукцион тәсілімен мемлекеттік сатып алудың қорытындыларына қарамастан, мұндай шығыстарды өтеу жөніндегі міндеттемелерді мойнына алмайды. № 543-IV № 161-V