Тармақ 1. Аукциондық комиссияға аукционға қатысушылар деп танылған әлеуетті өнім берушілердің аукционға қатысуға өтінімдерінің екінші бөлігін қарауға рұқсатты мемлекеттiк сатып алу веб-порталы аукцион аяқталған және аукцион қорытындылары туралы хаттама орналастырылған күні автоматты түрде береді. 2. Аукциондық комиссия күнтізбелік жеті күннен кешіктірілмейтін мерзімде аукционға қатысуға өтінімдердің екінші бөліктерін қарайды және аукционға қатысушылар деп танылған әлеуетті өнім берушілердің аукциондық құжаттамада белгіленген біліктілік талаптарына сай келуі немесе сай келмеуі туралы шешім қабылдайды. Әлеуетті өнім берушінің аукциондық құжаттамада белгіленген біліктілік талаптарына сай келмеуі туралы шешім қабылданған жағдайда, аукционға қатысуға өтінімдердің екінші бөліктерін қарау хаттамасы ресімделеді және мемлекеттік сатып алу веб-порталында жарияланады, оған аукциондық комиссияның төрағасы және отырысқа қатысқан барлық мүшелері, сондай-ақ аукциондық комиссияның хатшысы аукционға қатысуға өтінімдердің екінші бөліктерін қарау хаттамасы ресімделген күні қол қояды. Аукционға қатысуға өтінімдердің екінші бөліктерін қарау хаттамасында әлеуетті өнім берушілердің аукциондық құжаттамада белгіленген біліктілік талаптарына сәйкес келмеу себептері көрсетілген ақпарат қамтылуға тиіс. Аукциондық комиссия аукциондық құжаттамада белгіленген біліктілік талаптарына сай келмейтін әлеуетті өнім берушілер анықталған жағдайда, мұндай әлеуетті өнім берушілерге аукционға қатысуға өтінімдердің екінші бөліктерін қарау хаттамасы жарияланған күннен бастап үш жұмыс күні ішінде аукционға қатысуға өтінімдердің екінші бөліктерін аукциондық құжаттамада белгіленген біліктілік талаптарына сәйкес келтіру құқығын береді. 3. Аукционға қатысуға өтінімдердің екінші бөлігін қарау кезінде аукциондық комиссия: 1) аукционға қатысуға өтінімдердің екінші бөлігін қарауды жеңілдету үшін аукционға қатысушылар деп танылған әлеуетті өнім берушілерден материалдар мен түсіндірмелерді жазбаша нысанда және (немесе) электрондық құжат нысанында сұратуға; 2) аукционға қатысуға өтінімдердің екінші бөлігінде қамтылған мәліметтерді нақтылау мақсатында қажетті ақпаратты тиісті жеке немесе заңды тұлғалардан, мемлекеттiк органдардан жазбаша нысанда және (немесе) электрондық құжат нысанында сұратуға құқылы. Аукционға қатысуға өтінімдерді аукциондық құжаттамада белгіленген біліктілік талаптарына сәйкес келтірудің осы баптың 2-тармағының төртінші бөлігінде көзделген мерзімі өткеннен кейін аукционға қатысуға өтінімдерді жеткіліксіз құжаттармен толықтырудан, аукционға қатысуға өтінімде ұсынылған құжаттарды ауыстырудан, тиісінше ресімделмеген құжаттарды сәйкес келтіруден көрінетін аукционға қатысуға өтінімді аукциондық құжаттаманың талаптарына сәйкес келтіруге байланысты аукциондық комиссияның сауал жіберуіне және өзге де әрекеттеріне жол берілмейді. Аукциондық комиссия аукционға қатысуға өтінімдердің екінші бөлігін, егер онда ұсынылған өтінімдердің екінші бөлігінің мәнін қозғамайтын грамматикалық немесе арифметикалық қателер бар болса, аукциондық құжаттаманың талаптарына сай келеді деп қарайды. 4. Әлеуетті өнім беруші осы Заңда және электрондық мемлекеттік сатып алуды өткізу қағидаларында көзделген жағдайларда біліктілік талаптарына сәйкес келмейді деп танылады. 5. Аукционға қатысуға өтінімдердің екінші бөлігін қарау нәтижелері бойынша аукциондық комиссия аукционға қатысушылар деп танылған және аукциондық құжаттамада баға туралы ең төмен ұсыныс бойынша белгіленген біліктілік талаптарына сәйкес келетін әлеуетті өнім берушілер қатарынан аукцион жеңімпазын айқындайды және аукционға қатысушылар деп танылған және аукциондық құжаттамада белгіленген біліктілік талаптары болған кезде, оларға сәйкес келетін әлеуетті өнім берушілер қатарынан мемлекеттік сатып алу туралы шарт жасасуға үміткерлерді айқындайды не осы баптың 6-тармағында көзделген жағдайда аукционды өтпеді деп таниды. 5-1. Егер аукционға қатысуға өтінімдердің екінші бөліктерін қарау нәтижелері бойынша аукциондық комиссия бір ғана әлеуетті өнім берушіні аукциондық құжаттамада белгіленген біліктілік талаптарына сай келеді деп таныған болса, онда мұндай әлеуетті өнім беруші аукцион жеңімпазы деп танылады. 6. Егер аукционға қатысушы деп танылған және баға туралы ұсыныс берген бір де бір әлеуетті өнім беруші аукциондық құжаттамада белгіленген біліктілік талаптарына сәйкес келмесе, аукцион тәсілімен мемлекеттiк сатып алу өтпеді деп танылады. 7. Аукционның қорытындылары туралы хаттамаға аукциондық комиссияның төрағасы және қатысып отырған барлық мүшелері, сондай-ақ аукциондық комиссияның хатшысы аукционның қорытындылары туралы шешім қабылданған күні қол қояды. Аукциондық комиссияның хатшысы аукцион қорытындылары туралы хаттамаға қол қойылған күні оны қалыптастырады және мемлекеттік сатып алу веб-порталында орналастырады. 8. Тапсырыс беруші аукцион қорытындылары туралы хаттама бекітілген күннен бастап бес жұмыс күні ішінде мемлекеттік сатып алу туралы шарт жобасына қол қояды және оны аукцион жеңімпазына жібереді. 9. Аукцион жеңімпазы не осы баптың 10 және 11-тармақтарында көзделген жағдайларда, мемлекеттік сатып алу туралы шарт жасасуға үміткер мемлекеттік сатып алу туралы шартқа тапсырыс беруші қол қойған мемлекеттік сатып алу туралы шарт өзіне берілген күннен бастап жеті жұмыс күні ішінде қол қоюға және оны ұсынуға тиіс. Мемлекеттік сатып алу туралы шарттың елеулі талаптарына өзгерістер және (немесе) толықтырулар енгізуге жол берілмейді. Мемлекеттік сатып алу туралы шарт жасасудан жалтарған аукцион жеңімпазы осы Заңда белгіленген тәртіппен мемлекеттік сатып алудың жосықсыз қатысушылары тізіліміне енгізіледі. 10. Егер аукцион жеңімпазы мемлекеттік сатып алу туралы шарт жасасудан жалтарса, тапсырыс беруші өзінің баға туралы ұсынысы мемлекеттік сатып алу туралы шарт жасасудан жалтарған аукцион жеңімпазының баға туралы ұсынысынан кейін ең төмен болып табылатын мемлекеттік сатып алу туралы шарт жасасуға үміткермен мемлекеттік сатып алу туралы шарт жасасуға құқылы. 11. Мемлекеттік сатып алу туралы шарт жасасуға үміткер мемлекеттік сатып алу туралы қол қойылған шартты осы баптың 9-тармағында көзделген, белгіленген мерзімде табыс етпеген жағдайда, тапсырыс беруші өзінің баға туралы ұсынысы мемлекеттік сатып алу туралы қол қойылған шартты табыс етпеген, мемлекеттік сатып алу туралы шарт жасасуға үміткердің баға туралы ұсынысынан кейін ең төмен болып табылатын, мемлекеттік сатып алу туралы шарт жасасуға үміткермен мемлекеттік сатып алу туралы шарт жасасуға құқылы. Аукцион жеңімпазын қоспағанда, мемлекеттік сатып алу туралы қол қойылған шартты осы баптың 9-тармағында белгіленген мерзімде табыс етпеген, мемлекеттік сатып алу туралы шарт жасасуға үміткерлер, осы Заңда көзделген мемлекеттік сатып алудың жосықсыз қатысушылары тізіліміне енгізілмейді. 12. Аукциондық комиссияның шешіміне осы Заңның 45-бабында белгіленген тәртіппен шағым жасалуы мүмкін. № 543-IV № 161-V