Тармақ 1. Мемлекеттік сатып алуды жүзеге асыру кезінде шет мемлекеттерден шығарылатын тауарларға, тиісінше шетелдік әлеуетті өнім берушілер орындайтын жұмыстарға, көрсететін қызметтерге Қазақстанда шығарылған тауарлармен, тиісінше қазақстандық әлеуетті өнім берушілер орындайтын жұмыстармен, көрсететін қызметтермен тең талаптарда ұлттық режим Қазақстан Республикасы ратификациялаған халықаралық шарттарда көзделген жағдайларда және шарттарда қолданылады. 2. Елдің конституциялық құрылысының негіздерін қорғау, құқықтық тәртібін, ұлттық қауіпсіздігін және қорғаныс қабілетін қамтамасыз ету, Қазақстан Республикасының ішкі нарығын қорғау, ұлттық экономиканы дамыту, отандық тауар өндірушілерді, отандық жұмыс, көрсетілетін қызмет берушілерді қолдау мақсатында, уәкілетті орган мемлекеттік сатып алуды жүзеге асыру кезінде шет мемлекеттерден шығарылатын тауарларға, тиісінше шетелдік әлеуетті өнім берушілер орындайтын жұмыстарға, көрсететін қызметтерге рұқсатқа тыйым салу және аталған тауарларға, жұмыстарға, көрсетілетін қызметтерге рұқсатты шектеуге құқылы. Көрсетілген тауарлардың шығарылған елін айқындау Қазақстан Республикасының заңнамасына сәйкес жүзеге асырылады. 3. Осы баптың 2-тармағына сәйкес Қазақстан Республикасының Үкіметі оларға қатысты тыйым салуды, шектеулерді белгілеген тауарларды, жұмыстарды, көрсетілетін қызметтерді қоспағанда, уәкілетті орган шет мемлекеттерден шығарылатын тауарларға, тиісінше шетелдік әлеуетті өнім берушілер орындайтын, көрсететін жұмыстарды, қызметтерді мемлекеттік сатып алуды жүзеге асыру кезінде рұқсат беру талаптарын белгілеуге құқылы. N 239-V