Бап 55-1 Об образовании

Тармақ 1. Білім беру ұйымдарын мемлекеттік аттестаттау білім беру қызметінің тиісті білім беру деңгейінің мемлекеттік жалпыға міндетті стандартының талаптарына сәйкестігін айқындауға бағытталған, білім берудің сапасы мен қолжетімділігін кешенді түрде бағалау рәсімін білдіреді.

Тармақ 2. Мемлекеттік аттестаттау меншік нысанына және ведомстволық бағыныстылығына қарамастан, мектепке дейінгі тәрбие мен оқытудың, бастауыш, негізгі орта және жалпы орта білім берудің жалпы білім беретін оқу бағдарламаларын, техникалық және кәсіптік, орта білімнен кейінгі білімнің білім беру бағдарламаларын, сондай-ақ Сот төрелігі академиясында, әскери, арнаулы оқу орындарында жоғары және жоғары оқу орнынан кейінгі білім беру бағдарламаларын іске асыратын білім беру ұйымдарына қатысты жүзеге асырылады.

Тармақ 3. Мемлекеттік аттестаттауды:

• 1) меншік нысанына және ведомстволық бағыныстылығына қарамастан, білім беру саласындағы уәкілетті орган айқындайтын тәртіппен мектепке дейінгі тәрбие мен оқытудың, бастауыш, негізгі орта және жалпы орта білімнің жалпы білім беретін оқу бағдарламаларын, техникалық және кәсіптік, орта білімнен кейінгі білімнің білім беру бағдарламаларын іске асыратын білім беру ұйымдарына қатысты білім беру саласындағы уәкілетті органның ведомствосы және оның аумақтық бөлімшелері;
• 2) ведомстволық бағыныстылығына қарамастан, ғылым және жоғары білім саласындағы уәкілетті орган айқындайтын тәртіппен жоғары және жоғары оқу орнынан кейінгі білім беру бағдарламаларын іске асыратын әскери, арнаулы оқу орындарына қатысты ғылым және жоғары білім беру саласындағы уәкілетті органның ведомствосы;
• 3) денсаулық сақтау саласындағы техникалық және кәсіптік, орта білімнен кейінгі білімнің білім беру бағдарламаларын іске асыратын ұйымдарға қатысты денсаулық сақтау саласындағы уәкілетті орган өзі айқындайтын тәртіппен;
• 4) Сот төрелігі академиясына қатысты Қазақстан Республикасының Жоғары Сот Кеңесі өзі айқындайтын тәртіппен бес жылда бір рет өткізеді.

Тармақ 4. Бірінші мемлекеттік аттестаттау жаңадан құрылған, мынадай:

• 1) мектепке дейінгі тәрбие мен оқытудың жалпы білім беретін оқу бағдарламаларын іске асыратын білім беру ұйымдарында – қызметі басталған кезден бастап үш жыл өткен соң;
• 2) бастауыш, негізгі орта және жалпы орта білімнің жалпы білім беретін оқу бағдарламаларын іске асыратын ұйымдарда – төрт жыл өткен соң;
• 3) техникалық және кәсіптік, орта білімнен кейінгі, жоғары және жоғары оқу орнынан кейінгі білімнің білім беру бағдарламаларын іске асыратын ұйымдарда мамандардың алғашқы бітіру кезінен бастап бір жылдан кешіктірілмей өткізіледі.

Тармақ 5. Білім беру қызметінің тиісті білім беру деңгейінің мемлекеттік жалпыға міндетті стандартының талаптарына сәйкестігін бағалауды жүргізу нәтижелері бойынша білім беру ұйымы мемлекеттік аттестаттаудан өткен не өтпеген деп танылады.