Тармақ 1. Тараптар Орталықтың қызметін бақылауды Кеңес арқылы жүзеге асырады. 2. Кеңес құрамына әр мемлекеттен үйлестіруші құзыретті органның басшысы және Орталық директоры кіреді. 3. Кеңес Орталық қызметінің стратегиялық бағыттарын белгілейді. 4. Кеңестің функцияларына мыналар кіреді: Орталық қызметінің негізгі бағыттарын айқындау және көптарапты есірткіге қарсы операцияларды өткізуге байланысты туындайтын мәселелерді шешу кезінде көмек көрсету; Орталық басшылары лауазымына тағайындау үшін кандидатураларды қарау және келісу, мемлекет басшыларына оларды бекітуге ұсыну; Орталықтың құрылымы мен штаттық кестесін бекіту; Орталықтың қызметін бақылау; Орталықтың алдында тұрған мақсаттар мен міндеттерге қол жеткізу үшін қажетті ресурстарды айқындау; бюджетті қалыптастыру, бекіту және оның орындалуын бақылау; Орталықтың қызметі бойынша қаржы және аудиторлық есеп беруді зерделеу; ақпаратты және деректер базасын қорғау деңгейінің жай-күйін жүйелі түрде қарау; Орталық пен Тараптардың құзыретті органдары арасындағы даулы мәселелерді қарау; Орталықтың қызметін реттейтін нормативтік құқықтық актілерден туындайтын басқа да функциялар. 5. Кеңес отырыстары қажеттілігіне қарай, бірақ жылына кем дегенде екі рет уағдаластық бойынша Тараптардың бірінің аумағында өткізіледі. 6. Кеңес отырысында, әдетте отырысты өткізетін мемлекеттің өкілі төрағалық етеді. 7. Кеңестің отырыстарында шешімдер консенсус негізінде қабылданады. Егер отырыста Кеңес мүшелерінің кемінде 3/4 қатысса, шешім қабылданды деп есептеледі.