Уәкілетті ұйымдардың және Жобаға қатысушы мердігерлердің осы Келісім шеңберіндегі қызметіне салық салу, Каспий жағалауы газ құбырының тиісті учаскелері орналасқан мемлекеттің аумағында әрбір Тарап мемлекетінің заңнамасына сәйкес жүзеге асырылады. Каспий жағалауы газ құбырының тиісті учаскелері орналасқан мемлекеттер аумақтарындағы қандай да болмасын Тарап мемлекетінің заңнамасына уәкілетті ұйымдардың және Жобаға қатысушы мердігерлердің осы Келісім шеңберіндегі қызметіне салық салу шарттарының нашарлауына әкеп соқтыратын өзгерістер енгізілген жағдайда, уәкілетті ұйымдар мен Жобаға қатысушы мердігерлерге салық салу осы жаңартуға, салуға және пайдалануға қатысу кезеңінде және Жобаның өзін-өзі өтеу мерзіміне дейін Келісімге қол қойған кезде қолданыста болған сол Тарап мемлекетінің заңнамасына сәйкес жүзеге асырылатын болады. Осы Келісімнің мақсаты үшін салық салу шарттарының нашарлауы деп жаңа салықтарды, алымдарды, баждарды және (немесе) өзге осы тектес төлемдерді, салық ставкаларын, алымдар, баждардың және (немесе) өзге осы тектес төлемдердің көлемін көтеруді енгізу (белгілеу) түсіндіріледі. Осы баптың ережелері Каспий жағалауы газ құбырын жаңарту, салу және пайдалану жөніндегі қызметке ғана салық салуға қатысты қолданылады.