Тармақ 1. "Аль-Хиляль" Банкі Ислам Банкіне қатысты бас банк болып табылады. Бұл ретте Тараптар "Қазақстан Республикасындағы банктер және банк қызметі туралы" Қазақстан Республикасы Заңының (бұдан әрі - Банктер туралы Заң) бас банкте рейтингтік агенттіктердің бірінің барынша төмен талап етілетін рейтингінің болуы бөлігіндегі талаптары "Аль-Хиляль" Банкіне қолданылмайтындығы туралы келісті. 2. Тараптар Ислам Банкін ашуға Қазақстан Республикасының әділет органдарындағы заңды тұлға ретінде оны тіркеуді жүзеге асыру үшін Қазақстан Республикасы Қаржы нарығын және қаржы ұйымдарын реттеу мен қадағалау агенттігінің (бұдан әрі - Қаржылық қадағалау агенттігі) рұқсатын алу қажеттілігі бөлігінде Қазақстан Республикасы заңнамасының талаптары "Аль-Хиляль" Банкіне қолданылмайтындығы туралы келісті. 3. Тараптар Ислам Банкін ашу кезінде Ислам Банкінің банктік холдингі және/немесе ірі қатысушысы мәртебесін "Аль-Хиляль" Банкі өтінішінің негізінде Банктер туралы Заңның талаптары ескерілместен, Қаржылық қадағалау агенттігінің беретіндігі туралы келісті. 4. Тараптар "Аль-Хиляль" Банкі Біріккен Араб Әмірліктерінің уәкілетті органы тарапынан шоғырландырылған негізде реттелуге және қадағалануға тиіс, сондай-ақ Ислам Банкі және оның еншілес ұйымдары, филиалдары және өкілдіктері Қаржылық қадағалау агенттігі тарапынан шоғырландырылған негізде реттелуге және қадағалануға тиіс екендігі туралы келісті. 5. Тараптар реттеу мен қадағалау шеңберінде Ислам Банкінің аффилиирленген тұлғалары Қазақстан Республикасының қолданыстағы заңнамасына сәйкес анықталатындығы туралы келісті. Бұл ретте Ислам Банкінің аффилиирленген тұлғаларының аясын анықтау мақсатында "Аль-Хиляль" Банкі көрсетілген банктің ірі қатысушысы және оны бақылайтын тұлға болып танылады. Дербес немесе өзінің аффилиирленген тұлғаларымен бірлесіп, "Аль-Хиляль" Банкінің дауыс беруші акцияларының он және одан астам пайызын иеленетін, пайдаланатын, билік ететін тұлғалар, сондай-ақ "Аль-Хиляль" Банкі ірі қатысушысы болып табылатын не бақылауды жүзеге асыратын тұлғалар Ислам Банкінің аффилиирленген тұлғалары болып танылмайды. 6. Оффшорлық аймақтарда тіркелген немесе оффшорлық аймақтарда тіркелген аффилиирленген тұлғалары бар заңды тұлғалар немесе тізбесін Қаржылық қадағалау агенттігі белгілейтін оффшорлық аймақтарда тіркелген заңды тұлғалардың қатысушылары (құрылтайшылары, акционерлері) болып табылатын жеке тұлғалар Қазақстан Республикасының резидент банктерінің дауыс беруші акцияларын тура немесе жанама иелене және (немесе) пайдалана және (немесе) билік ете алмайтыны туралы Қазақстан Республикасы заңнамасының талабы Ислам Банкінің акционерлеріне және олардың аффилиирленген тұлғаларына қолданылмайды.