Осы Келісімде 2008 жылғы 25 қаңтардағы Үшінші елдерге қатысты тарифтік емес реттеудің бірыңғай шаралары туралы келісімнің 1-бабында айқындалған ұғымдар, сондай-ақ мынадай ұғымдар пайдаланылады: "бас лицензия" - Тараптардың шешімі негізінде сыртқы сауда қызметіне қатысушыға берілетін және лицензияда айқындалған санда лицензияланатын жекелеген тауар түрінің экспортына және (немесе) импортына құқық беретін лицензия; "ерекше лицензия" - сыртқы сауда қызметіне қатысушыға жекелеген тауар түрінің экспортына және (немесе) импортына ерекше құқық беретін лицензия; "бір жолғы лицензия" - мәні лицензияланатын тауар болып табылатын сыртқы сауда мәмілесі негізінде сыртқы сауда қызметіне қатысушыға берілетін және осы тауардың белгілі бір сандағы экспортына және (немесе) импортына құқық беретін лицензия; "рұқсат" - мәні оған қатысты белгілі бір сандағы экспортқа және (немесе) импортқа бақылау белгіленген тауар болып табылатын сыртқы сауда мәмілесінің негізінде сыртқы сауда қызметіне қатысушыға берілетін рұқсат беру құжаты; "өтініш беруші" - лицензияны немесе рұқсатты ресімдеу мақсатында Тарап мемлекеті атқарушы билігінің уәкілетті мемлекеттік органына құжаттар ұсынатын сыртқы сауда қызметіне қатысушы; "лицензияны орындау" - қатысты берілген лицензия негізінде кедендік ресімдеу жүргізілген үшінші елдерден Тараптар мемлекеттерінің кедендік аумақтарына тауарларды нақты әкелу немесе тауарларды Тараптар мемлекеттерінің кедендік аумақтарынан үшінші елдерге әкету.