Тармақ 1. Өтінішті қарау, лицензия беру және лицензияның бар екенін құжатты қайта ресімдеу үшін уәкілетті орган Тарап мемлекетінің заңнамасында көзделген тәртіппен және мөлшерде мемлекеттік баж (лицензиялық алым) алады. Мемлекеттік баж мөлшері көрсетілетін қызметтердің құнына сәйкес келуі тиіс. 2. Лицензиялар мен рұқсаттар оларға қатысты лицензиялау немесе қадағалау енгізілген Сыртқы экономикалық қызметтің бірыңғай тауар номенклатурасына сәйкес жіктелетін әрбір тауарға беріледі. 3. Лицензиялар мен рұқсаттарға қол қою құқығы берілген уәкілетті органдардың лауазымды тұлғалары қолдарының үлгілері, сондай-ақ уәкілетті органдардың мөрлері бедерлерінің үлгілері Тараптар мемлекеттерінің кеден органдарына хабарлау үшін Комиссияға жіберіледі. 4. Лицензияны немесе рұқсатты ресімдеу үшін берілген құжаттар, сондай-ақ лицензияның орындалуын растайтын құжаттар лицензияның немесе рұқсаттың қолданылу мерзімі аяқталғаннан кейін не лицензияның қолданылуын тоқтату немесе тоқтата тұру туралы шешім қабылданған күннен кейін 3 жыл ішінде уәкілетті органдарда сақталуға тиіс. Көрсетілген мерзім аяқталғаннан кейін құжаттар лицензия немесе рұқсат берілген Тарап мемлекетінің заңнамасында белгіленген тәртіппен жойылады. 5. Уәкілетті органдар берілген лицензиялар мен рұқсаттар туралы дерекқор жүргізуді жүзеге асырады және көрсетілген ақпаратты Комиссия белгілеген тәртіппен және мерзімде Комиссияға береді. Комиссия Тараптар мемлекеттерінің кеден органдарына берілген лицензиялар туралы деректерді береді. 6. Комиссияға үшінші елдерге қатысты бірыңғай тарифтік емес реттеу шараларын, тауарлардың сыртқы саудасын қозғайтын және Тараптар мемлекеттерінің ұлттық мүдделерін ескере отырып енгізілетін шараларды, сондай-ақ тауарлардың сыртқы саудасына тыйым салулар мен шектеулердің ерекше түрлерін қолдану жөніндегі тиісті өкілеттіктер берілген күннен бастап Комиссияға осы Келісімге 1 және 2-қосымшаларда көзделген тауарлардың жекелеген түрлерінің экспортына және (немесе) импортына лицензия беру және лицензияны ресімдеу туралы өтінішті ресімдеу туралы нұсқаулыққа және тауарлардың жекелеген түрлерінің экспортына және (немесе) импортына рұқсат жобасын ресімдеу және осындай рұқсатты ресімдеу туралы нұсқаулыққа өзгерістер енгізуге құқық беріледі.