Еңбекші-мигранттар мен олардың отбасы мүшелері қабылдаушы тараптың халықаралық шарттары мен заңнамасына сәйкес мынадай негізгі құқықтарды пайдаланады: өмір сүру; бостандық және жеке басына қол сұғылмау; некеге тұру; қабылдаушы Тараптың азаматтарымен заң мен сот алдындағы теңдік; жеке немесе отбасы өміріне заңсыз араласудан қорғау; тұрғын жайға қол сұғылмауына заңсыз нұқсан келтіруден қорғау; жеке хат жазысулардың немесе басқа да байланыс нысандарының құпиясын қорғау; ар-намысын, абыройын және іскерлік беделін қорғау; заңды негізде тиесілі жеке меншігін қорғау; білім алу; мәдени өмірге қол жеткізу және оған қатысу; зейнетақыдан басқа, әлеуметтік қамсыздандыру (әлеуметтік сақтандыру); өтеусіз негізде жедел (кезек күттірмейтін) медициналық көмек және қайтарымды негізде өзге медициналық көмек алу; қабылдаушы Тарапта баланың тууын тіркеу. 2. Тараптар еңбекші-мигранттар мен олардың отбасы мүшелеріне қабылдаушы Тараптың заңнамасына сәйкес сөз бостандығы, діни сенім, өз пікірін білдіру, қауымдастықтар, қоғамдық ұйымдар құру және кәсіптік одақтарға кіру құқықтарын іске асыруға кепілдік береді. 3. Әрбір еңбекші-мигрант пен оның отбасы мүшесі Тараптардың кез келгенінің заңнамасына және халықаралық шарттарына сәйкес өзінің осы Тараптың аумағындағы құқықтық субъектілігінің танылуына құқығы бар.