Тармақ 1. Мыналарды: 1) осы Кодекстің 33-тарауында көрсетілген жұмыстарды, көрсетілетін қызметтерді, егер Қазақстан Республикасы оларды өткізу орны болып табылса; 2) Қазақстан Республикасының аумағына кеден одағына мүше-мемлекеттердің аумағынан әкелінген тауарды қалпына келтіруді, құрамдас бөліктерін ауыстыруды қоса алғанда, оны жөндеу жөнінде көрсетілетін қызметтерді өткізу бойынша айналымдар қосылған құн салығынан босатылады. Осы Кодекстің 276-5-баптың 3-тармағында көзделген құжаттар осы тармақшада көрсетілген қызметтердің көрсетілуін растайтын құжаттар болып табылады. Осы тармақшада аталған қызметтердің тізбесін Қазақстан Республикасының Үкіметі бекітеді. 3) осы баптың 2-тармағының 2) тармақшасында көрсетілген тауарлардан өндірілген тауарларды осы баптың 2-тармағының 2) тармақшасында айқындалған салық төлеушілер Қазақстан Республикасының аумағында өткізген кезде тауарларды өткізу бойынша айналымдар қосылған құн салығынан босатылады. 2. Мыналар: 1) осы Кодекстің 255-бабында көзделген тауарлардың импорты қосылған құн салығынан босатылады. Осы тармақшада көрсетілген, кеден одағы шеңберінде тауарлар импортын қосылған құн салығынан босату тәртібін Қазақстан Республикасының Үкіметі айқындайды; 2) кеден одағына мүше мемлекеттердің аумағынан Қазақстан Республикасының аумағына өңдеуге арналған тауарларды, сондай-ақ олардың көмегімен тауарларды өңдеу жөніндегі операциялар жүзеге асырылатын тауарларды әкелу қосылған құн салығынан босатылады. Бұл ретте импортталатын тауарлардың тізбесі мен осындай тауарларды әкелуді жүзеге асыратын салық төлеушілердің тізбесі, сондай-ақ тауарлар мен салық төлеушілерді көрсетілген тізбелерге жатқызу тәртібін Қазақстан Республикасының Үкіметі айқындайды. 3. Қазақстан Республикасының Үкіметі бекіткен тізбеде көзделген тауарларды Қазақстан Республикасының аумағына уақытша әкелу уәкiлеттi орган белгілеген тәртіппен, нысан бойынша және мерзімдерде қосылған құн салығын төлеуден босатылады. Осы тармақтың бірінші бөлігінің мақсаты үшін кеден одағына мүше мемлекеттердің аумағынан Қазақстан Республикасының аумағына тауарларды уақытша әкелу деп, әкелінген тауарлардың қасиеттері мен сипаттарын өзгертпей, Қазақстан Республикасының аумағынан кейіннен әкету туралы міндеттемемен тауарларды, оның ішінде көлік құралдарын Қазақстан Республикасының аумағына әкелу түсініледі. Бұл ретте жекелеген салық төлеушілер уақытша әкелінген тауарларды, көлік құралдарын Қазақстан Республикасының аумағынан кейіннен әкету және оны уәкілетті орган белгілеген нысан бойынша, тәртіппен және мерзімдерде орындау туралы міндеттеме ұсынады. Тауарларды уақытша әкелуді жүзеге асыратын тұлға тауарларды уақытша әкелу мерзімін осындай әкелудің мақсаттары мен мән-жайларына сәйкес айқындайды, бірақ бұл мерзім осы Кодекстің 276-2-бабының 2) тармақшасының тоғызыншы абзацында көрсетілген тұлғаларды қоспағанда, осындай уақытша әкелінген тауарларды Қазақстан Республикасының аумағынан кейіннен әкету туралы міндеттемені ұсынған күннен бастап екі жылдан аспауға тиіс. Қызметін тұрақты мекеме құрмай жүзеге асыратын резидент емес заңды тұлғалар аталған тізбеде көзделмеген тауарларды Қазақстан Республикасының аумағына уақытша әкелген кезде қосылған құн салығы бойынша салық міндеттемесін орындауды уәкiлеттi орган белгілеген тәртіппен, нысан бойынша және мерзімдерде жүргізеді. Қазақстан Республикасының аумағына уақытша әкелінген, әкелу кезінде олар бойынша қосылған құн салығы төленбеген тауарларды әкетпеген жағдайда, тауарларды мұндай әкелу салық салу мақсатында салық салынатын импорт деп танылады және Қазақстан Республикасының аумағына тауарларды әкелген күннен бастап оларға осы Кодекстің 268-бабының 1-тармағында белгіленген ставка бойынша қосылған құн салығы салынуға жатады. 4. Қазақстан Республикасының аумағына бұрын әкелінген тауарлар Қазақстан Республикасының заңнамасына сәйкес импорт бойынша қосылған құн салығынан босатуға байланысты мақсаттардан өзге мақсаттарда пайдаланылған жағдайда, мұндай тауарлардың импорты бойынша қосылған құн салығы тауарды әкелген кезде қосылған құн салығын төлеу үшін осы Кодексте белгіленген мерзімнің соңғы күнінде төленуге жатады. 5. Қазақстан Республикасының лизинг алушы-салық төлеушісінің кеден одағына мүше басқа мемлекеттің лизинг берушісіне лизинг шарты бойынша төлейтін сыйақысы қосылған құн салығынан босатылады.