Жазбаша нысанда кедендік декларациялауға жататын, алып жүретін және алып жүрмейтін багажда кедендік шекара арқылы, сондай-ақ тасымалдаушы жеткізетін тауарлар ретінде өткізілетін жеке пайдалануға арналған тауарларға қатысты кедендік баждарды, салықтарды төлеу жөніндегі міндет декларантта:
- 1) кеден органы кедендік декларацияны тіркеген кезде туындаған кедендік баждарды, салықтарды төлеу жөніндегі міндеттемелерге қатысты кеден органы жеке пайдалануға арналған тауарларды шығарудан бас тартқан кезде;
- 2) жеке пайдалануға арналған тауарларды еркін айналымға шығару үшін осы Келісімде белгіленген ставкалар бойынша есептелген кедендік баждарды, салықтарды толық көлемде төлеген немесе өндіріп алған кезде;
- 3) жеке пайдалануға арналған тауарларды кеден одағына мүше мемлекеттің заңнамасына сәйкес осы мемлекеттің меншігіне айналдыру кезінде;
- 4) жеке пайдалануға арналған тауарларды белгіленген тәртіппен жоюдың не мемлекет пайдасы үшін бас тартудың кедендік рәсімдеріне орналастырған кезде;
- 5) авария салдарынан немесе еңсерілмейтін күштің әрекеті салдарынан не тасудың (тасымалдаудың) және (немесе) сақтаудың қалыпты жағдайы кезіндегі табиғи шығып қалуы салдарынан жеке пайдалануға арналған тауарлар жойылған (өтеусіз жоғалтылған) кезде;
- 6) кеден одағына мүше мемлекеттің заңнамасына сәйкес жеке пайдалануға арналған тауарларды өндіріп алу, оның ішінде жеке пайдалануға арналған тауарлардың құны есебінен өндіріп алған кезде;
- 7) осы Келісімге сәйкес кедендік төлемдерді төлеуден босата отырып жеке пайдалануға арналған тауарларды еркін айналымға шығарған кезде;
- 8) егер кедендік баждардың, салықтардың төленбеген сомасының мөлшері аумағында кедендік баждарды, салықтарды төлеу жөніндегі міндеттердің туындау сәтіне қолданылатын кедендік баждарды, салықтарды төлеу жөніндегі міндеттер туындаған кеден одағына мүше мемлекеттің заңнамасына сәйкес белгіленетін валюта бағамы бойынша екі евроға барабар сомадан аспаса;
- 9) кедендік баждардың, салықтардың сомаларын осы сомаларды өндіріп алуды жүзеге асырған кеден органы кеден одағына мүше мемлекеттің заңнамасында көзделген тәртіппен және негіздер бойынша өндіріп алуға үмітсіз деп тану және есептен шығару кезінде;
- 10) декларанттың өлуіне немесе кеден одағына мүше мемлекеттің заңнамасына сәйкес оны қайтыс болды деп жариялауға байланысты тоқтатылады.