Осы Келісім шеңберінде әкелуді және (немесе) әкетуді Тараптардың ынтымақтасушы органдары, бірлескен кәсіпорын, сондай-ақ ынтымақтасушы органдармен немесе бірлескен кәсіпорынмен келісім-шарттары бар орындаушы ұйымдар жүзеге асыратын тауарлар 2020 жылғы 31 желтоқсанға дейін Қазақстан Республикасының кедендік органдары өндіріп алатын кеден баждар мен салықтардан босатылуға жатады. Қазақстан тарапының Уәкілетті органы әрбір жағдайда Қазақстан Республикасының кеден органдарына тауарларды әкелу және (немесе) әкету осы Келісім шеңберінде жүзеге асырылатынын растайды, мұндай растауға тауарлар номенклатурасы мен саны туралы ақпаратты қоса береді. Қазақстан тарапы Уәкілетті органының Қазақстан Республикасының кеден органдарына осы Келісім шеңберінде Қазақстан Республикасының кедендік аумағына әкелу және (немесе) осы аумақтан әкету кезінде кедендік баждар мен салықтарды төлеуден босатылатын тауарлар туралы мәліметтерді беруінің тәртібін Қазақстан тарапы анықтайды. Осы Келісім шеңберінде Тараптардың ынтымақтасушы ұйымдары, бірлескен кәсіпорын және орындаушы ұйымдар жүзеге асыратын тауарлар импорты квоталауға, лицензиялауға және басқа да шектеулерге жатпайды. Осы баптың ережелері акциздік салық салуға жататын тауарларға қолданылмайды. Осы Келісім шеңберінде Тараптардың ынтымақтасушы ұйымдары арасында тауарларды жеткізу, сондай-ақ жұмыстарды орындау және қызметтер көрсету осы Келісім күшіне енген күннен бастап 2020 жылғы 31 желтоқсанға дейін Қазақстан Республикасында қосылған құн салығынан босатылуға жатады. Осы Келісім шеңберінде қосылған құн салығынан босату үшін жеткілікті негіз болып табылатын құжаттар: 1) осы Келісім шеңберінде Тараптардың ынтымақтасушы ұйымдары арасында жасалған келісімшарттар; 2) Қазақстан Тарапының уәкілетті органының тауарларды, жұмыстарды, көрсетілетін қызметтерді жеткізу осы Келісімнің шеңберінде жүргізілгенін растайтын тиісті құжат, ол: мынадай келісімшарттар: Қазақстан Республикасының Жерді қашықтықтан зондтаудың ғарыш жүйесін жеткізу жөніндегі жұмыстарды орындауға арналған 2009 жылғы 6 қазандағы № 05-85 келісімшарт; сынау учаскелерінің жабдығын (ТFЕ) жеткізуге және Ғарыш аппараттарын құрастыру-сынау кешенінің ТFЕ жеткізу жөніндегі жұмыстарды орындауға арналған 2010 жылғы 27 қазандағы № 05-117 келісімшарт; ғарыш аппараттарын құрастыру-сынау кешенін жобалауды және салуды сүйемелдеу жөніндегі қызметтер көрсетуге арналған 2010 жылғы 27 қазандағы № 05-118 келісімшарт; арнайы конструкторлық-технологиялық бюроны (АКТБ) жобалау және құрылуын сүйемелдеу жөніндегі жұмыстарды орындауға арналған 2012 жылғы 29 маусымдағы № 05-96 келісімшарт; арнайы конструкторлық-технологиялық бюроны (АКТБ) жобалау бойынша көрсетілетін қызметтерді сатып алуға арналған 2013 жылғы 27 ақпандағы № 05-37 келісімшарт үшін берілген; болашақ келісімшарттар үшін осы құжат олар күшіне енгенге дейін беріледі; 3) орындалған жұмыстардың, көрсетілетін қызметтердің актілері; 4) осы Келісім шеңберінде қол қойылған келісімшарттарға қатысты шот-фактуралар болып табылады. № 313-V