Осы Келісім шеңберіндегі ынтымақтастық мынадай нысандарда жүзеге асырылады: бірлескен бағдарламалар мен жобаларды, оның ішінде үшінші елдердің қатысуымен жоспарлау және жүзеге асыру; ғылыми және техникалық ақпаратпен, арнайы біліммен, эксперименттік деректермен, тәжірибелік-конструкторлық жұмыстар нәтижелерімен және ғарыш техникасы мен технологияларының әр түрлі салаларындағы материалдармен өзара алмасу; ғарыш кеңістігін бейбіт мақсаттарда зерттеу және пайдалану әрі осы саладағы технологиялық жаңартуларды практикалық қолдану мемлекеттік бағдарламаларына, сондай-ақ ғарыш инфрақұрылымының дамуына бағытталған халықаралық бағдарламаларға қолжетімділікке өзара жәрдемдесу; ғарыш аппараттарын ұшыруды және басқаруды қамтамасыз ету үшін жерүсті объектілері мен жүйелерін пайдалану; кадрлар даярлау бағдарламаларын ұйымдастыру, мамандармен және ғалымдармен алмасу; бір Тарап мемлекеті азаматтарының екінші Тарап мемлекетінің жоғары оқу орындарындағы оқу бағдарламаларын толық көлемде оқуына қолжетімділікке өзара жәрдемдесу; бірлескен симпозиумдар мен конференциялар өткізу; бірлескен кәсіпорындар құру және ынтымақтастықтың басқа да нысандарын қолдау. Ынтымақтастықтың қосымша нысандары Тараптар арасындағы өзара уағдаластық бойынша жазбаша нысанда белгіленеді.