Тармақ 1. Мемлекет жалғыз қатысушысы болып табылатын жауапкершілігі шектеулі серіктестікте, Қазақстан Республикасының заңдарында және (немесе) жауапкершілігі шектеулі серіктестіктің жарғысында жауапкершілігі шектеулі серіктестіктің жалғыз қатысушысының айрықша құзыретіне жатқызылған мәселелерді шешуді қоспағанда, жауапкершілігі шектеулі серіктестіктің қызметіне жалпы басшылықты жүзеге асыратын басқару органы – байқау кеңесі құрылуы мүмкін. Байқау кеңестері құрылатын, мемлекет жалғыз қатысушысы болып табылатын жауапкершілігі шектеулі серіктестіктерге қойылатын өлшемшарттарды мемлекеттік жоспарлау жөніндегі орталық уәкілетті орган бекітеді.
Тармақ 2. Жалғыз қатысушы жауапкершілігі шектеулі серіктестіктің байқау кеңесінің мүшелерін сайлайды (қайта сайлайды) және олардың өкілеттігін мерзімінен бұрын тоқтатады.
Тармақ 3. Байқау кеңесін құру және тарату тәртібін, байқау кеңесінің құрамына сайланатын адамдарға қойылатын талаптарды, сондай-ақ байқау кеңесінің мүшелерін конкурстық іріктеу және олардың өкілеттіктерін мерзімінен бұрын тоқтату тәртібін мемлекеттік жоспарлау жөніндегі орталық уәкілетті орган бекітеді.
Тармақ 4. Мемлекет жалғыз қатысушысы болып табылатын жауапкершілігі шектеулі серіктестіктің байқау кеңесінің өкілеттік мерзімі бес жылдан аспайды.
Тармақ 5. Мемлекет жалғыз қатысушысы болып табылатын жауапкершілігі шектеулі серіктестіктің байқау кеңесі мүшелерінің саны тақ болуға және бір-бірімен және жауапкершілігі шектеулі серіктестіктің басшысымен жақын туыстық және жекжаттық қатынастарда болмайтын кемінде бес адамнан құралуға тиіс.
Тармақ 6. Мемлекет жалғыз қатысушысы болып табылатын жауапкершілігі шектеулі серіктестіктегі байқау кеңесі құрамының кемінде жартысы байқау кеңесінің тәуелсіз мүшелері болуға тиіс.
Тармақ 7. Байқау кеңесінің хатшысы мемлекет жалғыз қатысушысы болып табылатын жауапкершілігі шектеулі серіктестіктің жұмыскері болып табылады және ол байқау кеңесінің мүшесі болып табылмайды. Байқау кеңесінің хатшысы байқау кеңесіне есеп береді, оның отырыстарын дайындау мен өткізуді, отырысқа материалдар ресімдеуді қамтамасыз етеді және байқау кеңесі мүшелерінің отырыстардың материалдарына қол жеткізуінің қамтамасыз етілуіне бақылау жүргізеді.
Тармақ 8. Мемлекет жалғыз қатысушысы болып табылатын жауапкершілігі шектеулі серіктестіктің байқау кеңесі қызметінің және оның шешімдер қабылдау тәртібі жауапкершілігі шектеулі серіктестіктің жарғысында, сондай-ақ жалғыз қатысушы қабылдаған өзге де актілерде айқындалады.
Тармақ 9. Мемлекет жалғыз қатысушысы болып табылатын жауапкершілігі шектеулі серіктестіктің атқарушы органының және байқау кеңесінің мүшелері (лауазымды адамдары) өздерінің әрекеттерімен (әрекетсіздігімен) жауапкершілігі шектеулі серіктестікке келтірілген залал үшін жауапкершілігі шектеулі серіктестік алдында Қазақстан Республикасының заңдарына сәйкес жауапты болады.