Тараптар өз құқықтық жүйесінің негізгі қағидаттарын сақтаған кезде мынадай іс-әрекеттерді қылмыстық жазаланатын деп тану үшін қажетті заңнамалық және өзге шараларды қабылдайды: а) егер мұндай мүлік осы мүліктің қылмыстық көзін жасыру немесе бүгіп қалу мақсатында немесе негізгі қылмысты жасауға қатысатын кез келген тұлғаға өзінің іс-әрекеті үшін жауап беруден жалтаруы үшін көмек көрсету мақсатында жүзеге асырылатын қылмыстардан түсетін кірістерді білдіретіндігі белгілі болса, мүліктің конверсиясы, сондай-ақ онымен жасалатын кез келген мәмілелер; б) егер мұндай мүлік қылмыстардан түсетін кірістерді білдіретіндігі анық болса, мүліктің түпнұсқалы сипатын, көзін, орналасқан жерін, иелік ету тәсілін, орнын ауыстыруды немесе оған құқықтарды немесе оның тиесілігін жасыру немесе бүгіп қалу; в) егер мұндай мүлік қылмыстардан түсетін кірістерді білдіретіндігі белгілі болса, мүлікті сатып алу, иелік ету немесе пайдалану; г) осы бапқа сәйкес осындай деп танылған қылмыстардың кез келгенін жасауға бірге қатысу, сондай-ақ осындай қылмысты жасауға әрекеттену немесе сондай қылмысты жасауға дайындалу; д) терроризмді қаржыландыру.
Тармақ 1. Құзыретті органдар сұрау салу (тапсырма) бойынша немесе өздерінің бастамасы бойынша бір-біріне қылмыстық кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері жөніндегі ақпаратты (құжаттарды, материалдарды, өзге де деректерді) береді. 2. Ақпарат беру, егер бұл беруші Тараптың ұлттық қауіпсіздігіне зиян келтірмеген және оның заңнамасына қайшы келмеген жағдайда ғана жүзеге асырылады. 3. Осы баптың 1-тармағында көрсетілген ақпарат оны берген Тараптың алдын ала келісімінсіз берілетіннен басқа өзге мақсаттарда пайдаланылмайды деген шартпен беріледі. 4. Уәкілетті органдар арасында ақпарат алмасу осы Шарттың 23-бабына сәйкес жүзеге асырылады.