(1) [Өтінімнің элементтері] (а) Уағдаласушы тарап, егер Нұсқаулықта өзгеше көзделмесе және (2)-(8)-тармақтардың ережелері ескеріле отырып, өтінім берушінің таңдауы бойынша қағазда немесе беру күнінің мақсаты үшін ведомство рұқсат ететін өзге де тәсілмен ұсынылған мына төмендегі барлық элементтерді: (і) осы элементтердің өтінімге арналғанын анық немесе астарлап түсіндіретін нұсқауды; (іі) ведомствоға өтінім берушіні анықтауға немесе өтінім берушімен байланысуға мүмкіндік беретін нұсқауларды; (ііі) сырттай сипаттама сияқты көрінетін бөлігін оның ведомствосы алған күн өтінімді беру күні болатынын көздейді. b) Уағдаласушы тарап беру күнінің мақсаты үшін (а)(ііі) тармақшада аталған элемент ретінде сызбаны қабылдауы мүмкін. с) Уағдаласушы тарап беру күнінің мақсаты үшін өтінім берушінің жеке басын анықтауға мүмкіндік беретін мәліметтермен бірге, сондай-ақ ведомствоға өтінім берушімен байланысуға мүмкіндік беретін мәліметтерді ұсынуды талап ете алады немесе ол өтінім берушінің жеке басын анықтауға мүмкіндік беретін немесе ведомствоға өтінім берушімен байланысуға мүмкіндік беретін дәлелдемелерді (а)(іі) тармақшада аталған элемент ретінде қабылдай алады. (2) [Тіл] (а) Уағдаласушы тарап (1)(а)(і) және (іі)-тармақта аталған нұсқаулардың ведомство қабылдаған тілде ұсынылуын талап ете алады. (b) (1)(а)(ііі) тармақшада аталған бөлік беру күнінің мақсаты үшін кез келген тілде ұсынылуы мүмкін. (3) [Хабарлау] Егер өтінім Уағдаласушы тарап (1) және (2)-тармақтарға сәйкес қолданатын бір немесе бірнеше талаптарды қанағаттандырмаса, ведомство осындай кез келген талапты орындауға және Нұсқаулықпен ұйғарылған мерзім ішінде ескертулерді беруге мүмкіндік бере отырып, ол туралы өтінім берушіге неғұрлым тез арада хабарлайды. (4) [Талаптарды кейін орындау] (а) Егер бастапқы берілген өтінімде Уағдаласушы тараптың (1) және (2)-тармақтарға сәйкес қолданатын бір немесе бірнеше талаптары орындалмаса, (b) тармақшасы мен (6)-тармақты ескере отырып, Уағдаласушы тараптың (1) және (2)-тармақтарға сәйкес қолданатын барлық талаптары кейін орындалған күн беру күні болып табылады. (b) Егер (а) тармақшасында аталған бір немесе бірнеше талаптар Нұсқаулықта ұйғарылған мерзім ішінде орындалмаған жағдайда, Уағдаласушы тарап өтінім берілмеді деп есептеуді көздей алады. Егер өтінім берілмеген болып есептелсе ведомство тиісті себептерді көрсете отырып, ол туралы өтінім берушіге хабарлайды. (5) [ Сипаттаманың немесе сызбаның жетіспейтін бөлігіне қатысты хабарлау] Егер беру күнін белгілеу кезінде ведомство өтінімде сипаттаманың бір бөлігі болмауы мүмкін немесе өтінімде болмауы мүмкін сызбаға сілтеме жасалып отыр деп есептесе, ведомство ол туралы өтінім берушіге дереу хабарлайды. (6) [Сипаттаманың немесе сызбаның жетіспейтін бөлігін ұсынған жағдайда беру күні] (а) Егер сипаттаманың жетіспейтін бөлігі немесе жетіспейтін сызба ведомствоға Нұсқаулықта ұйғарылған мерзім ішінде берілсе сипаттаманың бұл бөлігі немесе сызба өтінімге енгізіледі және(b) және (с) тармақшалары ескеріле отырып, ведомство сипаттаманың осы бөлігін немесе осы сызбаны алған күн немесе (1) және (2)-тармақтарға сәйкес Уағдаласушы тарап қолданатын барлық талаптар орындалған күн, олардың қайсысы неғұрлым кеш болып табылатынына байланысты, беру күні болып табылады. (b) Егер сипаттаманың жетіспейтін бөлігі немесе жетіспейтін сызба (1)(а)-тармақта аталған бір немесе бірнеше элементтерді алғашқы рет ведомство алған күні бұрынғы өтінімнің басымдығы сұратылатын өтінімде (а) тармақшаға сәйкес олардың қалып қойғанын түзету үшін ұсынылса, Нұсқаулықта белгіленген мерзім ішінде және Нұсқаулықта ұйғарылған талаптар ескеріле отырып, өтінім берушінің берген қолдаухаты бойынша Уағдаласушы тараптың (1) және (2)-тармақтарға сәйкес қолданатын барлық талаптар орындалған күн өтінім берген күн болып табылады. (с) Егер (а) тармақшаға сәйкес ұсынылған сипаттаманың жетпейтін бөлігі немесе жетпейтін сызба Уағдаласушы тарап белгілеген мерзім ішінде алып қойылса, Уағдаласушы тарап (1) және (2)-тармақтарға сәйкес қолданатын барлық талаптар орындалған күн беру күні болып табылады. (7) [Сипаттаманы және сызбаны бұрын берілген өтінімге сілтеме жасап ауыстыру] (а) Нұсқаулықта ұйғарылған талаптар ескеріле отырып, өтінімді беру күні мақсатында ертерек берілген өтінімге ведомство қабылдаған тілде өтінім беру кезінде жасалған сілтеме сипаттама мен кез келген сызбалардың орнына жүреді. (b) (a) тармақшада аталған талаптар орындалмаған жағдайда өтінім берілмеген болып есептелуі мүмкін. Егер өтінім берілмеген болып есептелсе ведомство тиісті себептерді көрсете отырып, ол туралы өтінім берушіге хабарлайды. (8) [Ерекшеліктер] Осы бапта ешнәрсе: (і) өтінім берушінің Париж конвенциясының 4G(1) немесе (2)-бабына сәйкес осы бапта аталған жеке өтінім беру күні ретінде осы бапта аталған бастапқы өтінім күнін және тиісті жағдайларда басымдық құқығының үстемдігін сақтау құқығын; (іі) Уағдаласушы тараптың Нұсқаулықта ұйғарылған кез келген түрдегі өтінімге алдыңғы өтінімді беру күні үстемдігін беру үшін қажетті кез келген талаптарды қолдану құқығын шектемейді.