Тармақ 1. Тараптар осы Келісімнің 2-бабында айқындалғандай, өзінің ұлттық заңнамасында табиғи монополиялар субъектілерінің қызметтеріне қол жеткізуді қамтамасыз ететін реттеу қағидаларын белгілеуге міндеттенеді. Тараптар әрқайсысының ұлттық органдары табиғи монополиялар субъектілерінің қызметтеріне тұтынушылардың қол жеткізуін қамтамасыз ету қағидаларының және оларға қосу (қосылу/пайдалану) шарттарының сақталуын бақылауды қамтамасыз етеді. 2. Табиғи монополиялар субъектілерінің қызметтеріне тұтынушылардың қол жеткізуін қамтамасыз ету қағидаларына: 1) шарттардың елеулі талаптары, сондай-ақ оларды жасасу және орындау тәртібі; 2) техникалық мүмкіндіктердің болуын айқындау тәртібі; 3) табиғи монополиялар субъектілері көрсететін қызметтер, олардың құны, оларға қол жеткізу, өткізудің ықтимал көлемі, осындай қызметтерді көрсетудің техникалық пен технологиялық мүмкіндіктері туралы ақпаратты ұсыну тәртібі; 4) мүдделі тұлғалардың табиғи монополиялар субъектілері қызметтерінің айналымын және (немесе) оларға қол жеткізу шарттарын салыстыру мүмкіндігін қамтамасыз етуге мүмкіндік беретін ашық ақпаратты алу талаптары; 5) коммерциялық құпия бола алмайтын ақпарат тізбесін; 6) табиғи монополиялар субъектілерінің қызметтеріне қол жеткізу мәселелері бойынша шағымдарды, арыздарды қарау және дауларды реттеу тәртібі кіреді. 3. Табиғи монополиялардың нақты салаларында транзит мәселелерін қоса алғанда, осы баптың ережелерін қолдану ерекшеліктері тиісті секторалдық (салалық) келісімдерде айқындалады. 4. Егер мұндай шарттар әрбір Тараптың ұлттық заңнамасының сақталуы шартымен тұтынушылардың Тараптардың кез келгені мемлекетіне тиесілігі қағидаты бойынша қолданылмайтын болса, Тараптар мемлекеттерінің табиғи монополиялар субъектілерінің өз қызметтеріне Тараптар мемлекеттері тұтынушылары қол жеткізуінің сараланған шарттарын (табиғи монополияның салалық (секторалдық) келісімдерде айқындалатын әрбір жекелеген саласының ерекшелігін ескере отырып), қолдануына жол беріледі. 5. Осы баптың 4-тармағының ережелеріне нұқсан келтірместен, Тараптардың ұлттық заңнамасында Тараптардың кез келгені мемлекетіне тұтынушылардың тиесілігін негізге ала отырып, Тараптар мемлекеттерінің тұтынушыларына қатысты табиғи монополиялар субъектілерінің қызметтеріне қол жеткізудің сараланған шарттарын белгілейтін нормалар болмауға тиіс.