Тармақ 1. Осы Кодекстің 150-бабының 1-тармағы бірінші бөлігінің 3) тармақшасын қолдану мақсатында «Оңтүстік» арнайы экономикалық аймағын құруға сәйкес келетін қызмет түрлері мыналар болып табылады: киімнен басқа, дайын тоқыма бұйымдарын шығару; трикотаж бұйымдарын шығару; тоқыма материалдарынан тігілетін киім шығару; жібек маталар мен солардың негізінде жасалатын бұйымдар шығару; мата емес тоқыма материалдар мен солардан жасалған бұйымдар шығару; кілемдер, кілем бұйымдары мен гобелендер шығару; мақта целлюлозасы мен одан туынды өнімдер шығару; мақта шикізатынан жоғары сапалы қағаз шығару; тері бұйымдарын шығару. 2. Қызметін «Оңтүстік» арнайы экономикалық аймағының аумағында жүзеге асыратын ұйымдардың салықтарды және жер учаскелерін пайдаланғаны үшін төлемдерді есептеуі кезінде: 1) бюджетке төленуге тиіс корпоративтік табыс салығының сомасын айқындау кезінде осы Кодекстің 139-бабына сәйкес корпоративтік табыс салығының есептелген сомасы 100 пайызға азайтылады; 2) салық салу объектілері және (немесе) салық салумен байланысты арнайы экономикалық аймақтың аумағында орналасқан және осы баптың 1-тармағында көзделген қызмет түрлерін жүзеге асыру кезінде пайдаланылатын объектілер бойынша: жер салығын есептеу кезінде тиісті ставкаларға 0 коэффициент; уақытша өтеулі жер пайдалану (жалдау) шартында көрсетілген, бірақ уақытша өтеулі жер пайдалану (жалдау) құқығына жер учаскелерін берген күннен бастап он жылдан аспайтын мерзімге жер учаскелерін пайдаланғаны үшін төлемдерді есептеу кезінде тиісті ставкаларға 0 коэффициент; мүлікке салынатын салықты есептеу кезінде салық салу объектілерінің орташа жылдық құнына 0 пайыз ставка қолданылады.