Тармақ 1. Тауардың шыққан елі - тауар толығымен шыққан немесе осы Хаттамаға сәйкес жеткілікті өңдеуге (қайта өңдеуге) ұшыраған мемлекет. 2. Жеткілікті өңдеу (қайта) өңдеу өлшемі - тауарлардың шығу өлшемдерінің бірі, егер тауарды шығаруға екі немесе одан көп ел қатысса, ол соған сәйкес тауарға тән қасиеттерді беру үшін жеткілікті соңғы елеулі өңдеуге (қайта өңдеуге) ұшыраған мемлекеттің аумағында шыққан деп саналады. 3. Дайындау (өндіру) - мақсаты өнім алу болып табылатын жинауды және қандай да бір ерекше операцияларды қоса алғанда, өндірістік немесе технологиялық операциялардың кез келген түрін орындау. 4. Материал - өнімді шығару үшін пайдаланылатын кез келген ингредиент, шикізат, құрамдас немесе бөлшек және т.б. 5. Шетелден шыққан материал - Уағдаласушы тараптар мемлекеттерінің аумақтарынан шықпаған материал немесе шыққан жері анықталмаған материал. 6. Өнім - дайындалған (өндірілген) өнім, тіпті ол басқа өндірістік операцияға одан әрі пайдалануға арналған болса да. 7. Тауар - кез келген мүлік, материал және сол сияқты өнім, соның ішінде жылу, электр, өзге де энергия түрлері мен кеден шекарасы арқылы өтетін көлік құралдары (жолаушылар мен тауарларды халықаралық тасымалдауды жүзеге асыратын көлік құралдарын қоспағанда). 8. Тауар легі - бір жүк жөнелтушіден екінші жүк жөнелтушінің атына бір немесе бірнеше тауар-көлік құжаттары бойынша бір уақытта жеткізілетін тауарлар, сондай-ақ бір пошта жүкқұжатымен жіберілетін не шекарадан өтетін бір адамның жүгі ретінде өткізілетін тауарлар. 9. Франко-зауыт шарттарындағы баға - кәсіпорнында франко-зауыт шарттарымен соңғы өңдеу (қайта өңдеу) жүргізілген дайындаушыға төленуі тиіс тауардың құны. 10. Резидент - заңды тұлға мәртебесі жоқ, Уағдаласушы тараптар мемлекеттерінің бірінің ұлттық заңнамасы бойынша тұрған жері, тұрақты келген жері, басқару, тіркеу орны негізінде оған салық салынатын кез келген жеке және заңды тұлғалар, кәсіпорындар немесе ұйымдар. Алайда, тауарларды өндіруге және (немесе) сатуға байланысты емес операциялардан алынған табысына қатысты ғана Уағдаласушы тарапта салық салуға ұшырайтын тұлғалар көрсетілген ұғымға қосылмайды. 11. Жүк жөнелтуші (жүк алушы) - өздеріне алған міндеттемелеріне сәйкес тауарларды тасымалдаушыға (тасымалдаушыдан) берген (қабылдаған) немесе беруге (қабылдауға) ниеттенген тауар-көлік құжаттарында көрсетілген тұлға. 12. Экспорттаушы - сыртқы сауда шартының (мәмілесінің) тарапы болып табылатын, тауарды екінші Уағдаласушы тарап мемлекетінің резидентіне жеткізетін Уағдаласушы тараптар мемлекеттерінің бірінің резиденті. 13. Импорттаушы - сыртқы сауда шартының (мәмілесінің) тарапы болып табылатын, тауарды екінші Уағдаласушы тараптың мемлекеті резидентінің тауарын алушы Уағдаласушы тараптар мемлекеттерінің бірінің резиденті. 14. Өтініш беруші - тауардың шыққан жері туралы сертификатта көрсетілген тауарлар туралы мәліметтердің дұрыстығын растайтын және ол үшін жауап беретін тауардың шыққан жері туралы сертификатты алу үшін әкететін елдің уәкілетті органына (ұйымына) жүгінген тұлға. Тауарды экспорттаушы-жүк жөнелтушілер немесе әкетуші елдің ұлттық заңнамасына сәйкес олардың мүддесін білдіретін тұлғалар өтініш беруші бола алады (сенімхаттың, тапсырма шартының және басқа да құжаттардың негізінде). Көрсетілген ұғымға импорттаушы тауардың жүк алушысы немесе әкетуші елдің ұлттық заңнамасына сәйкес олардың мүддесін білдіретін тұлға да қосыла алады (сенімхаттың, тапсырма шартының және басқа да құжаттардың негізінде). 15. Тауардың шыққан жері туралы сертификат - тауардың шығатын елін куәландыратын және Уағдаласушы тараптардың бірінің ұлттық заңнамасына сәйкес сол мемлекет уәкілеттік берген орган (ұйым) берген құжат. 16. Тауардың шыққан жері туралы декларация - дайындаушы, сатушы немесе тауарды алып өтетін тұлға коммерциялық шотта не тауарға қатысы бар өзге де құжатта жасаған тауардың шыққан жері туралы мәлімдеме. 17. Тікелей жеткізу — басқа мемлекеттің аумағы арқылы жүргізбей Уағдаласушы тараптардың бірінен екінші Уағдаласушы тараптың аумағына тасымалданатын тауарлар тасымалы. 18. Тауардың кедендік құны - ГАТТ 1994 VII бабын қолдану туралы келісімге сәйкес белгіленген құн.