Тармақ 1. Уағдаласушы тараптың нақты мемлекетінде тауардың шыққан жерін растау үшін еркін сауда режимін беру мақсатында әкелу елінің кеден органдарына СТ-2 нысанындағы тауардың шыққан жері туралы сертификаттың (бұдан әрі - сертификат) түпнұсқасын беру қажет. Еркін сауда режимін беру мақсатында сертификаттың қолданылу мерзімі Уағдаласушы тарап мемлекетінің ұлттық заңнамасына сәйкес тауардың шыққан жері туралы сертификаттарды беруге және (немесе) куәландыруға уәкілетті орган оны куәландырғаннан күннен бастап 12 айды құрайды. 2. Сертификат тауардың бір легіне ресімделеді және беріледі. 3. Әкелетін елдің кеден органдарына сертификат орыс немесе ағылшын тілдерінде қағаз жеткізгіште беріледі. 4. Жеткізілген тауарлардың іс жүзіндегі саны сертификатта көрсетілген санының 5 пайызынан аспауы тиіс. 5. Сертификат өтініш берушінің жазбаша өтінішінің негізінде тауарды әкеткеннен кейін де берілуі мүмкін. Бұл ретте, өтініш беруші тауардың іс-жүзінде әкетілгенін растайтын кеден органының тиісті белгісі бар кедендік декларацияны уәкілетті органға қосымша ұсынады*. Бұл жағдайда сертификаттың 5-бағанында «кейіннен берілді» деп көрсетіледі. 6. Сертификат жоғалған немесе бүлінген жағдайда оның ресми куәландырылған телнұсқасы беріледі. Телнұсқа берілген жағдайда 12. «Куәлік» деген бағанда телнұсқа берілген күн көрсетіледі, ал 5. «Қызметтік белгілер үшін» деген бағанда «Телнұсқа» деген белгі, жоғалған немесе бүлінген сертификат түпнұсқасының нөмірі мен күні көрсетіледі. Сертификаттың телнұсқасы түпнұсқа берілген күннен бастап күшіне енеді. Еркін сауда режимін беру мақсатында сертификаттың телнұсқасын қолдану мерзімі сертификаттың түпнұсқасын берген күннен бастап 12 айдан аспауы тиіс. 7. Қандай да бір себеппен жойылған сертификаттың орнына не бұрын берілген сертификатты қайта рәсімдеу қажеттілігі туындаған жағдайда өтініш берушінің жазбаша өтінішінің негізінде жаңа сертификат берілуі мүмкін. Бұл ретте, 5-бағанға «жойылған (қайта ресімделген) сертификаттың нөмірі мен күнін көрсете отырып, «СТ-2 нысанындағы сертификаттың орнына берілді» деген жазба енгізіледі. Басқа сертификаттың орнына берілген сертификатқа жаңа тіркеу нөмірі беріледі. ___________________ * Бұл ретте, кеден органының белгісі сертификатты беру күнінен ерте күн қойылуы керек.